“Paşinyanın Qarabağı Ermənistan hesab etməsi siyasi sərsəmlikdir”. ONN media bildirir ki, bunu Publika.az-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib. Millət vəkili bildirib ki, bu, Paşinyanın hər gün bir az daha çox azalan reytinqinin yüksəlməsi üçün daxili auditoriyaya etdiyi populist müraciətdir: “Məsələ burasındadır ki, Paşinyan dediyi sözlərə özü belə inanmır. Aprel döyüşlərindən sonra nəinki Qarabağda, hətta Ermənistanda da təhlükəsiz yaşamağın mümkün olmadığını bütün ermənilər dərk edir. Çünki Ermənistan süni dövlət kimi məhz Azərbaycanın tarixi torpaqlarında yaradılıb. O torpaqların isə hər qarışının sahibi var və gec-tez bir gün gedib öz torpaqlarımızda yaşayacağıq. Ancaq hazırkı vəziyyətdə bir ölkənin rəsmi baş naziri olan birinin başqa ölkənin torpaqlarını özününkü hesab etməsi və oraya səfərə gəlməsi beynəlxalq hüququn pozulması, eyni zamanda Ermənistanın işğalçı dövlət olmasının sübutudur”. Millət vəkili qeyd edib ki, Paşiyanın belə məsuliyyətsiz sözləri və davranışları ATƏT-in Minsk Qrupu və onun həmsədrləri tərəfindən təcili olaraq qınanınlmalı və çəkindirici tədbirlərə əl atılmalıdır: “Əks təqdirdə, bü cür davranışlar müharibəyə səbəbdir və Azərbaycan bunu etməyə həm iqtisadi, həm də hərbi-siyasi qüdrəti ilə hazırdır. Ermənilərin heç gözləmədikləri bir vaxtda ildırımsürətli bir həmlə paşinyanların siyasi təlxəkliyinə birdəfəlik son qoya bilər. Ona görə də yaxşı olar ki, həm ATƏT-in Minsk Qrupunun həmsədrləri, həm də Ermənistanda rasional düşünməyi bacaran daxili siyasi aktorlar vəziyyəti düzgün qiymətləndirib problemin həlli ilə bağlı konkret addımlar atsınlar”.