"Son hadisələr bir daha təsdiq etdi ki, İran deyilən dövlət qərbin məqsədli olaraq yaratdığı bir modeldir".

ONN media xəbər verir ki, bunu Olaylar.az-a açıqlamasında Turan  Araşdırma  Mərkəzi İB-nin sədr müavini Cavid İsmayıl deyib.

"Heç kimə sirr deyil ki, İran otuz ilə yaxın torpaqlarımızı işğalda saxlayan ermənilərə  donor rolunu oynayan ölkələrdəndir. 

Onlar Ermənistanla yanaşı ermənilərin işğal etdiyi torpaqlarımızda dayanıqlı məskunlaşmaları üçün əllərindən gələn bütün köməyi  ediblər. Azərbaycan ərazilərində məskunlaşan işğalçıları dünya qiymətlərindən xeyli aşağı qiymətə, güzəştli əsaslarla təbii qazla, dizel və benzinlə təchiz etməsi İranın xəbis niyyətinin göstəricisidir. İşğalçılara iqtisadi dəstəklə yanaşı digər sahələrdə də birbaşa dəstək verib. Buna sübut kimi 2019-cu ilin 14 oktyabrında Şuşamızda böyük təntənə ilə erməni-İran elmi mədəniyyət mərkəzinin açılışını da qeyd etmək yerinə düşər. 

Qəhrəman Azərbaycan əsgəri şərəf tariximizin 44 günlük Zəfər salnaməsini yazarkən də İran ermənilərə yanacaq, silah-sursat və hərbi ləvazimatlar göndərməklə yanaşı, Arazboyu şanlı ordumuzun qarşısına bizim torpaqlarda əsgər çıxararaq haradasa bir gün ordumuzu ləngitməyə nail oldu və   bununla da ermənilərə yeni mövqedə güclənməyə şərait yaratdı.

İranın müsəlmanın Allah evinə donuz bağlayanlara, İslam mənəvi dəyərlərini tapdalayanlara qucaq açması və 2019-cu ildə Tasua və Aşura günlərində 51-ci erməni oyunlarının açılış mərasimində səsli-küylü musiqi və kollektiv rəqslər təşkil etməsi bir daha sübut etdi ki, İran nə İslam ölkəsidir, nə də ki, Əhli-Beytçi. İran doğrudan da qərbin məqsədli olaraq yaratdığı ağ əmmaməli keşiş dövlətidir.

İranın molla rejimi  İran deyilən dövlətin yerləşdiyi coğrafiyanın dədədən əsl sahibləri olan 50 milyona yaxın türkün  bütün hüquqlarını, o cümlədən, ana dilində təhsil almaq hüququnu da əlindən  alıb. Bu rejim anlamalıdır ki, dədə yurdda türklər mütləq öz hakimiyyətini bərqərar edəcək. Parçalanmış Azərbaycan yenidən bir olacaq. Bunu İran deyilən dövlətin yaradıcıları olan qərbin ideoloqları da artıq anlamaqdadır. O gün heç də uzaqda deyil.