Millət vəkili Rza Rzayevi həm müdafiə, həm tənqid etdi

Rza Rzanın hərəkəti xoşagələn deyil, amma görən kiminsə əzizi hər hansı bir haqsızlıqla, təhqirlə, xoşagəlməz bir hadisəylə qarşılaşarsa həmin kimsələr özlərini necə aparar?

ONN media xəbər verir ki, bunu millət vəkili Aqil Abbas “Geyilməmiş ayaqqabılar”  filminin rejissoru Rza Rzayevlə Bakı şəhərindəki 220 nömrəli məktəbin direktoru arasında yaşanan qalmaqla münasibətini bildirərkən deyib.

Millət vəkili öncə xatırladıb ki, R. Rzayevi əvvəllər mətbuatda dərc olunan məqalələrindən tanıyıb, şəxsi tanışlıqları olmayıb.

“Amma tale elə gətirdi ki, “Dolu” filmi çəkilərkən bir kollektivdə çalışmalı olduq. Üç-dörd ay, demək olar ki günorta-axşam, bir yerdə çörək yedik. Dəfələrlə həm kino çəkilişi zamanı, həm də çəkilişdən sonra ölkənin regionlarına birgə səfərlərə çıxdıq, həm də yol yoldaşı olduq. Deyirlər qardaşın necə adamdı, deyir yol yoldaşı olmamışam, bilmirəm. Mən də Rzanı yol yoldaşlığında tanıdım. Bu boylu-buxunlu, bir az da kor-kobud görünüşlü adamın necə incə qəlbə sahib olduğunu, uşaq kimi saf və təmiz , kövrək olduğunu onunla yarımca saat söhbət eləyəndə görmək olar.

Mən həyatımda bu qədər utancaq bir insan görməmişəm. Onun yanında kimsə kobud, yaxud xoşagəlməz bir ifadə işlədəndə Rza qızarır. Mən həddindən artıq zarafatcıl, lətifə danışmağı, bir qədər açıq-saçıq danışmağı xoşlayan adamam. Yəni dostlar arasında qoruq-qaytağı elə gözləmərəm. İlk tanışlığımız gündən hiss elədim ki, mənim bir qədər açıq-saçıq danışmağım, latayır lətifələrim Rzaya heç xoş gəlmir. Bəzən hərdən məclisi tərk edirdi, bir az meşədə gəzişirdi, sonra qayıdırdı” – deyən millət vəkilinin sözlərinə görə,  kino işçiləri də həddən artıq zarafatçıldılar, açıq-saçıq danışmağı, etikadan kənar lətifələr söyləməyi xoşlayarlar.

Ümumiyyətlə, yaradıcı adamların 90-95 faizi elə belə olur, yəni çərçivələrə sığmırlar:

“Rza tamamilə fərqliydi. Həddindən artıq yüksək bir mədəniyyətə malik idi. Mən onun yüksək mədəniyyətinə və tərbiyəsinə heyran qalmışdım. Yəni indiki zamanda saflığını və təmizliyini qoruyub saxlamaq çətin məsələdi. Rza onu qoruyub saxlaya bilib. Hətta zarafatla deyirdim ki, "Rza, həddən artıq mədəniyyətli olmaq özü bir mədəniyyətsizlik əlamətidi”. Gülürdü.

Rzanı tanıyanlar çox gözəl bilir ki, bu günədək onun dilindən bir kor-kobud söz çıxmayıb. Kimisə nəinki təhqir etməyib, heç xətrinə belə dəyməyib. Özünü mərhum Heydər Əliyevin bir əsgəri sayan Rza həm də dövlətçiliyimizin yolunda, torpaqlarımızın uğrunda filmdə deyil, həyatda canından keçməyi “uf” demədən bacara bilən bir şəxsiyyətdi. Eləcə də dost yolunda, hətta küçədə tanımadığı bir insanın yolunda da özünü qurban verməyi bacarır. Bəs necə oldu ki, belə bir mədəni, saf, təmiz insan bir məktəbə gedir, məktəbin direktorunu təhqir edir və ya hədələyir? Deməli, buna nə isə bir səbəb olub. Bunun özülündə bizim bilmədiyimiz və təxminən hiss elədiyimiz bir səbəb yəqin ki var. Heç kəsi alt qat maraqlandırmır, səbəb maraqlandırmır. Çünki həmin o alt qat və səbəb Rzanı sosial şəbəkələrdə linç edənlər üçün lazım deyil. Heç bir kəs durub durduğu yerdə belə bir hərəkətə yol verməz, onda ki Rza kimi bir mədəni, tərbiyəli adam ola.Bir daha deyirəm, Rzanın hərəkəti xoşagələn deyil, amma görən kiminsə əzizi hər hansı bir haqsızlıqla, təhqirlə, xoşagəlməz bir hadisəylə qarşılaşarsa həmin kimsələr özlərini necə aparar? Deməli, Rzanı təbdən çıxaran ciddi bir hadisə baş verib ki, o da belə bir xoşagəlməz hərəkət edib. Və bu hərəkətləri nələrisə yeməyi bacarmayan hər kəs edə bilər. Qanunu heçə sayan adamlar haqlıları haqsız duruma salır. Rza elədiyi hərəkətə görə lap qanun qarşısında qoy cavab versin. Amma onu bu hərəkətə sövq edənlər də yaxalarını kənara çəkə bilməzlər. Bu məsələyə qanun çərçivəsində baxılarsa, elə birinci Rzanın qələmə aldığı və faktlara söykənən məsələ araşdırılmalıdır. Həm Təhsil Nazirliyi tərəfindən, həm də hüquq-mühafizə orqanları tərəfindən”.