May ayının 29-da “Park İNN” hotelində Vergilər və Təhsil nazirliklərinin birgə təşkilatçılığı ilə Azərbaycan Xalq Cümhuriyyətinin 100 illiyinə həsr olunan SABAH tələbələri arasında Vergi Bilik Yarışması keçirilib.

Vergilər Nazirliyindən ONN media -ya verilən məlumata görə, tədbirdə çıxış edən vergilər nazirinin müşaviri Elçin Məmmədov iştirakçıları salamlayaraq onları Azərbaycan Xalq Cumhuriyyətinin 100 illiyi münasibətilə təbrik edib. Bildirilib ki, maarifçiliyi öz faəliyyətinin tərkib hissəsi sayan Cümhuriyyət hökumətinin 100 illik yubileyi münasibətilə belə bir bilik yarışması təşkil olunması çox sevindiricidir. Şərqin ilk demokratik Respublikasının cəmi 23 ay yaşamasına baxmayaraq, elmin, təhsilin inkişafına böyük töhfələr verib. Cümhuriyyət dövrünün maarifçilik siyasəti müasir Azərbaycanda da uğurla davam etdirilir.

Qeyd edilib ki, Vergilər Nazirliyi sosial məsuliyyət strategiyası çərçivəsində cəmiyyətin maarifləndirilməsinə öz töhfəsini verir və bu baxımdan, təhsil müəssisələri ilə əməkdaşlığa xüsusi yer verir. Ölkəmizdə işəgötürənlərlə təhsil alanlar arasında effektiv əlaqənin qurulması istiqamətində Vergilər Nazirliyi ilə Təhsil Nazirliyi və SABAH qrupları arasında səmərəli əməkdaşlıq qurulub. Bu əməkdaşlıq çərçivəsində keçirilən bilik yarışması da tələbələrə növbəti töhfədir.

Bilik yarışlarının tələbələrin tədris dövründə şəxsi və peşəkar inkişafında, təlim və peşə hazırlığı üzrə biliklərinin dərinləşməsində və möhkəmlənməsində mühüm rolu olduğu vurğulanıb.

Təhsil Naziriyinin SABAH qrupları İcra Komitəsinin rəhbəri Şahin Seyidzadə çıxış edərək bildirib ki, qrup tələbələri üçün mütəmadi olaraq müxtəlif tədris və tədrisdənkənar fəaliyyətlər təşkil edilir, tələbələrin inkişafına dəstək verilir. Ölkəmizin gənc insan kapitalının inkişafı üçün 2 aparıcı dövlət qurumunun bu cür tədbirlər fonunda birgə əməkdaşlığı nümunəvi bir haldır və bunun davamlı olacağına inanırıq. Azərbaycan Respublikası Vergilər Nazirliyi ilə Təhsil Nazirliyi arasında bağlanmış əməkdaşlıq memorandumu çərçivəsində SABAH tələbələrinə vergi strukturlarına təcrübə, işə qəbul, birgə elmi tədqiqatların aparılması və s. kimi geniş imkanlar yaradılır.

Bilik Yarışına ümumilikdə 10 ali təhsil müəssisəsini təmsil edən komandalar qatılıb. İlk 3 komanda yarışın qalibi olub. Bakı Dövlət Universitetini təmsil edən komanda 1-ci yer, Azəbaycan Dövlət Neft və Sənaye Universitetini təmsil edən komanda 2-ci yer, Azərbaycan Memarlıq və İnşaat Universitetini təmsil edən komanda 3-cü yeri tutub.

Qaliblərə sertifikat, qiymətli hədiyyələr və Azərbaycan Xalq Cümhuriyyəti Ensiklopediyası hədiyyə olunub.