ONN İnformasiya Agentliyi

Vətəndaşların malına göz dikən məmurlar cəzalandırılmalıdır

Vətəndaşların malına göz dikən məmurlar cəzalandırılmalıdır
05 May 2020 - 11:44


Müsahibimiz Milli Vəhdət Partiyasının sədri Yunus Oğuzdur.

– Yunus müəllim, bəzi məmurlar bu pandemiya dövründə Prezidentə kömək etmək əvəzinə dövlət başçısının gördüyü işlərə kölgə salırlar. Sizcə belələrinə nə ad vermək olar?

– Dünya iqtisadiyyatını çökdürmüş, dəhşətli əlamətləri ilə insanları təşvişə salmış koronavirus pandemiyasının ikinci dalğası müşahidə olunmaqdadır. Artıq dünyanın inkişaf etmiş ölkələri belə bu dəhşətli epidemiyanın qarşısını almaqda çarəsiz qalıblar. Birsıra Avropa ölkələrindən fərqli olaraq Prezident İlham Əliyevin rəhbərliyi ilə dünyanı bürüyən COVİD-19 pandemiyasına qarşı Azərbaycan dövləti qəti tədbirlər həyata keçirir. Bu istiqamətdə görülmüş işlər, qəbul edilmiş təxirəsalınmaz qərarlar ölkəmizin bu bəladan minimum itkilərlə çıxmasına zəmin yaradır. Çox təəssüflər olsun ki, ölkə Prezidenti və Birinci vitse-prezidentin şəxsi təşəbbüsü və tövsiyələri ilə aztəminatlı vətəndaşlar üçün nəzərdə tutulan sosial dəstək proqramının icrasında neqativ hallara yol verilir. Xüsusən, dövlət aparatında çalışan, nəinki iqtidara, eyni zamanda dövlətçiliyə, xalqa xəyanət edən bir sıra insanlar var ki, onlar ölkəmizdə pandemiya dövrü aparılan sosial dəstək siyasətinə qarşı mənəviyyata sığmayan hərəkətlərə yol veriblər. Belə ki, çoxsaylı şikayətlər, korrupsiya halları, rüşvətxorluq, dövlət əmlakınıtalama nəticəsində həbs olunmuş Ağstafa, Yevlax, Neftçala rayon İcra Hakimiyyətlərinin başçılarından nəticə çıxarmayan növbəti şəxs Biləsuvar rayon İcra Hakimiyyətinin başçısıdır. Ölkə Prezidenti İlham Əliyev tərəfindən dəfələrlə ictimaiyyət qarşısında vəzifəli şəxslərə, xüsusilə icra başçılarına müvafiq tapşırıqların verilməsinə baxmayaraq Biləsuvar rayon İcra Hakimiyyətinin başçısı dövlətin mənafeyinə ciddi zərbə vurmuş, pandemiya dövrü ehtiyacı olan şəxslərə dövlət tərəfindən ayrılmış maddi dəstəyi qanunsuz olaraq mənimsəmişdir. Heç şübhəsiz ki, Prezident tərəfindən verilmiş tapşırıqlardan düzgün nəticə çıxarmayan, rüşvət və korrupsiya hallarına son qoymayan şəxslər dövlət tərəfindən ciddi cəzalandırılacaqlar.

– Demək olar ki Prezident İlham Əliyev hər çıxışında “Mən xalqın xidmətçisiyəm” deməklə məmurlara mesajlar verirdi. Bəs bunu bəzi məmurların hələ də dərk etməməsinə necə baxırsınız?

– Bəli, Dövlət başçısı dəfələrlə Prezidentdən başlayaraq lap aşağı səviyyəli məmura qədər vəzifəli şəxslərin əsas vəzifəsinin xalqa xidmət etmək olduğunu deyir, şəffaflığın təmini ilə bağlı mühüm mesajlar verir. Xalqın malına göz dikən məmurlar üçün nümunə elə cənab Prezidentin özü və Birinci vitse-prezident Mehriban Əliyevadır, onların apardığı siyasətdir. Onların əhalinin həssas qrupuna, xüsusən, şəhid ailələrinin üzvlərinə münasibəti, onlara bərabər tutulan vətəndaşlara dərin hörmət və ehtiramı sözün əsl mənasında bir örnəkdir. Məmurlar da bundan nümunə götürməli, aztəminatlı ailələrə göstərilən dövlət qayğısını ləyaqətlə icra etməlidirlər. Başqa sözlə, məmurun vəzifəsi Prezidentin təyin etdiyi şəxs olaraq əhaliyə xidmət etməkdir. Çox təəssüf ki, bəzi məmurlar, xüsusən yerli icra hakimiyyəti orqanlarının rəhbərləri bunu dərk etməyərək öz çirkin fəaliyyətləri ilə dövlətin adına ləkə vurmuş olurlar. Prezidentin onlara göstərdiyi etimada hörmətsizlik edərək vətəndaşların haqqına girmiş olurlar. Odur ki, Prezidentin dediyi kimi Azərbaycanda hər şey şəffaf olmalı, məmurların fəaliyyəti qanun çərçivəsində olmalıdır. Yerli icra orqanları rəhbərlərinin vətəndaşlara münasibəti kökündən dəyişməlidir.

– Azərbaycanda kadr islahatlarının ikinci mərhələsi davam edir. Dövlət bəzi rüşvətxor məmurlardan xilas ola biləcəkmi?

– Bəli, ölkədəaparılan ictimai-siyasi, iqtisadi, hüquqi və kadr islahatlarının növbəti mərhələsi həyata keçirilməkdədir. Artıq özünü doğrultmayan bir sıra icra başçıları gənc, intellektual, müasir idarəetmə təcrübəsinə malik kadrlarla əvəzlənib. Birmənalı şəkildə qeyd etmək olar ki, bu istiqamətdə addımlar bundan sonra da davam etdiriləcək və Azərbaycan dövlətinin bütün strukturlarında zəruri islahatlar davam edəcək. Heç şübhəsiz ki, dövlət başçısının yürütdüyü bu siyasət bəzi məmurların özbaşınalıq hallarının aradan qaldırılması, xalqın, dövlətin malını mənimsəməsinə son qoyacaq.

– Azərbaycanda Baş Prokurorluq postuna Korrupsiyaya Qarşı Mübarizə Baş İdarəsinin rəisi Kamran Əliyevin təsdiqi bəzi korrupsioner qruplaşmaların yəqin ki, ürəyincə olmadı. Bu haqda nə deyə bilərsiniz?

– Artıq Prezident İlham Əliyev Milli Məclisin razılığı ilə Azərbaycan Respublikasının yeni Baş Prokurorunu təyin etdi. Bu posta Korrupsiyaya Qarşı Mübarizə Baş İdarəsinin rəisinin namizədliyinin verilməsi Azərbaycanda korrupsiyaya qarşı aparılan ciddi mübarizənin təzahürüdür. Yeni seçilmiş Baş prokuror öz çıxışında siyasi, hüquqi islahatların, eləcədə aparılan kadr islahatlarının ölkəmizin yeni inkişaf mərhələsinə keçidini, şərtləşdirdiyini qeyd edib. Bununla yanaşı, bu gün Azərbaycan parlament tarixində bir ilk yaşandı. Azərbaycan Respublikasında İcra Hakimiyyəti ilə Qanunvericilik Hakimiyyəti arasında əlaqə məhz Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsi tərəfindən həyata keçirildi. Bu da ölkədə aparılan siyasi islahatların dərinləşməsinə və yeni siyasi konfiqurasiyanın formalaşmasına dəlalət edir. Sadalanan faktlar əminlik yaradır ki, dövlət qulluqçusu adına ləkə gətirən məmurlar icra strukturlarından təmizlənəcək, Azərbaycanda demokratiya və şəffalıq tam təmin olunacaq.

Bilman İsaq

ONN İnformasiya Agentliyi
image_printÇap Et
OXŞAR XƏBƏRLƏR
Şərhlər
Şərh yoxdur
XƏBƏR LENTİ
ONN-agentlik.png ONN-agentlik.png ONN-agentlik.png ONN-agentlik.png ONN-agentlik.png ONN-agentlik.png