Trabzonda arvadını güllələyib öldürən Elvin Umayev polisə ifadə verib.

Trabzon Polis Şöbəsi əməkdaşları tərəfindən saxlanılan şübhəli Elvin Umayev bacısı ilə Rizədə yaşadığını, Trabzona həyat yoldaşı Turanə Umayeva ilə barışmaq ümidi ilə gəldiyini bildirib.

İfadəsinin davamında narkotik maddələrin qanunsuz dövriyyəsi ilə məğul olduğuna görə 5 il həbsdə yatdığını və 4 ay əvvəl azadlığa çıxandan sonra Türkiyəyə gəldiyini deyib.

Məqsədinin isə Trabzonda yaşayan həyat yoldaşı və 13 yaşlı əkiz uşaqlarını görüb ailəsi ilə barışmaq olub.

"Dünən həyat yoldaşımla görüşəndə, ​​o, artıq məni istəmədiyini və buradan getməyimi istədi. Mən də getsəm uşaqlarımla nə vaxt istəsəm görüşə biləcəyimi dedim. Cavabında həyat yoldaşım mənə əsəbi şəkildə uşaqları heç vaxt görməyə icazə verməyəcəyini bildirdi. Ondan sonra qanlı hadisə baş verdi".

Elvin Umayev onu da əlavə edib ki, həyat yoldaşını vurduğu silahı iki ay əvvəl alıb.

Qeyd edək ki, 34 yaşlı Elvin Umayev 38 yaşlı həyat yoldaşı Turanə Umayeva ilə aralarındakı münasibətə aydınlıq gətirmək üçün parkdakı çayxanada görüşüblər. Söhbət zamanı aralarında yaranan mübahisə zamanı Elvin, belindən çıxardığı tapança ilə Turanənin başından atəş açıb. Qadın hadisə yerində ölüb.