Məktəbəhazırlıq qruplarına şagird qəbul olunduqdan sonra valideynlər istəsə, yerdəyişmə sistemi vasitəsilə övladlarının yerini dəyişə bilər. ONN media xəbər verir ki, bu sözləri Bakı Şəhəri üzrə Təhsil İdarəsinin müdir müavini İlhamə Abdullayeva da Təhsil Nazirliyində məktəbəhazırlıq qruplarına sənəd qəbulu ilə bağlı keçirilən mətbuat konfransında deyib. O, məktəbəhazırlıq qrupları ilə bağlı bir sıra məsələlərə aydınlıq gətirib: “Bakı şəhərindəki bir sıra məktəblərə valideynlər daha çox müraciət edirlər. Həmin məktəblərə, ilk növbədə, məktəbin yerləşdiyi ərazidə qeydiyyatda olan şəxslərin övladları yerləşdiriləcək, boş yer qaldığı halda qeydiyyatı başqa ərazilərdə olanlar qəbul olunacaq. Uşağın şəxsiyyət vəsiqəsi yoxdursa, doğum haqqında şəhadətnamə ilə də qeydiyyatdan keçmək mümkündür. Rayonda yaşayan və internetə çıxşı olmayan valideynlər məktəblərdə yaradılan alternativ qeydiyyat mərkəzləri vasitəsilə övladlarını qeydiyyatdan keçirə biləcəklər. Qeydiyyatı unudan yox, üzürlü səbəbdən apara bilməyən valideynlərə uşaqlarının məktəbəhazırlıq qruplarına qeydiyyata salınmasına köməklik olunacaq”. İ.Abdullayeva məktəbəhazırlıq qruplarında maksimum və minimum şagird sayından da danışıb: “Məktəbəhazırlıq qrupları bir sinifdə kənd yerlərində minimum 10, şəhər yerlərində minimum 15, maksimum isə 30 nəfərdən ibarət ola bilər. Elektron sistemlə qeydiyyat bu gündən başlayaraq sentyabrın 25-nə qədər, sənədlərin məktəbə təqdim edilməsi isə sentyabrın 2-dən 26-na qədər davam edəcək”.