COP29 zolağına görə hələ də cərimə yazılır?

27-11-2024, 13:55

Bakıda, aeroport yolunda, Binə körpüsündən şəhər istiqamətində COP29 nişanı çəkilmiş zolaqda avtomobillərin cərimələndiyi iddia olunub.

ONN media xəbər verir ki, bununla bağlı videogörüntü sosial şəbəkədə müzakirə mövzusuna çevrilib.

Vətəndaş iddia edib ki, zolaqda avtobus yolu olduğunu bildirən hər hansı nişanın olmamasına və COP29 zolaqlarının artıq qüvvədən düşməsinə baxmayaraq, yol kənarında olan kameralar hələ də ətrafda olan avtomobilləri çəkir.

Məsələ ilə bağlı açıqlama verən Azərbaycan Yerüstü Nəqliyyat Agentliyi (AYNA) ərazidəki nişanın götürüldüyünü təsdiqləyib.

"Ərazidə 5.9, avtobus zolağını bildirən yol nişan sökülüb", - məlumatda qeyd edilib.

Bakı Şəhər Dövlət Yol Polisi İdarəsinin (BŞDYPİ) baş inspektoru, polis baş leytenantı Rüstəm Əhmədli açıqlamasında həmin zolaqla hərəkət etdiyinə görə heç bir avtomobilin cərimə olunmadığını deyib:

"Təəssüf hissi ilə bildiririk ki, dəfələrlə edilən xəbərdarlıqlara baxmayaraq, bəzi sürücülər hələ də avtomobillərini ümumi istifadədə olan avtobus dayanacağı meydançasında və ya 5.12 yol nişanlarından 15 metrdən az məsafədə saxlayırlar.

Avtobusların dayanacağa daxil olmasına maneə yaradaraq qaydaları pozan sürücülərlə bağlı isə Azərbaycan Respublikası İnzibati Xətalar Məcəlləsinin (İXM) 346.2-ci maddəsinə uyğun olaraq, tədbirlər həyata keçirilir. Həmin sürücülər 40 manat məbləğində cərimə olunurlar".

ONN İnformasiya Agentliyi