PKK terror təşkilatından təmizlənən, Türkiyənin İraqla sərhədində yerləşən Hakkari bölgəsindəki Cilo Dağlarının arasında olan Sat Buz Göllərində “1-ci Təbiət İdmanları Festivalı” keçirilib.

ONN media xəbər verir ki, təhlükəsizlik qüvvələrinin xüsusilə son zamanlarda həyata keçirdiyi uğurlu əməliyyatlarla terrordan təmizlənən yaylaq və təbii gözəlliklərin olduğu sahələr uzun müddətdən sonra turistlərə açıq elan edilib.

3400 m yüksəklikdə yerləşən gölün ətrafına 100-dən çox təbiətsevər və idmançı qatılıb. Onlar yamac paraşütü, üzgüçülük və dağ velosipedi ilə məşğul olub, milli yeməkləri dadıblar.

Axşam isə düşərgə ocağı ətrafında toplaşanlar mahnı oxuyub, halay çəkib və əyləniblər.

Terrorçulardan təmizlənən ərazinin təbii şəraitinin olduğu kimi qalması və qısa müddətdə xalqın istifadəsinə verilməsi hər kəs tərəfindən rəğbətlə qarşılanıb.

Qeyd edək ki, Türkiyə Silahlı Qüvvələrinin Suriyanın Afrin şəhərini terrorçulardan təmizləmək üçün həyata keçirdiyi “Zeytun budağı” hərəkatı da eyni mənzərə ilə sona çatmış, şəhərə heç bir ziyan verilmədən terrorçular bölgədən təmizlənmişdi.