“Gürcüstan Dəmir Yolları” QSC-nin yeni yaradılmış Həmkarlar İttifaqı genişmiqyaslı tətilə hazırlaşır. ONN media xəbər verir ki, bu barədə Həmkarlar İttifaqının sədr müavini İlya Lejava məlumat verib. O deyib ki, 6 mindən çox üzvü olan təşkilatın əsas məqsədi əməkhaqlarının 50 faizədək artırılmasına nail olmaqdır. Hazırda dəmiryolçular tutduqları vəzifədən asılı olaraq 300 laridən 1000 lariyədək əməkhaqqı alırlar. Əməkhaqları 2012-ci ildən sonra artırılmayıb, amma istehlak səbətinin qiymətləri xeyli artıb. Bu da ciddi problemlər yaradır. Həmkarlar İttifaqı məsələ ilə əlaqədar konkret təkliflər planı hazırlayıb. Sənəddə dəmiryolçuların əməkhaqlarının mərhələli şəkildə artırılması nəzərdə tutulub. Artıq 4800 dəmiryolçu tətillə bağlı petisiyanı imzalayıb. Avqustun 10-da təşkilat tətilə başlamağın konkret vaxtını elan edəcək. “Tətilə başlanılan gündən Gürcüstanda dəmir yolu vasitəsilə daxili və xarici daşınmalar avtomatik olaraq dayandırılacaq”, - deyə Lejava vurğulayıb. Məlumat üçün qeyd edək ki, “Şərq-Qərb” nəqliyyat dəhlizinin bir hissəsini təşkil edən Gürcüstan dəmir yollarının ümumi uzunluğu 1324 kilometrdir. Qonşu ölkənin dəmir yolları sisteminə 45 tunel, 1714 körpü, eləcə də Rusiya və Ukrayna ilə parom əlaqələri daxildir.(axar)