Bakı Metropoliteni karantin dövründə dəymiş ziyanı müəyyən etməyib. ONN media xəbər verir ki, bunu Nazirlər Kabineti yanında Operativ Qərargahın bu gün keçirilən brifinqində "Bakı Metropoliteni" Qapalı Səhmdar Cəmiyyətinin İdarə Heyətinin sədri Zaur Hüseynov deyib. Onun sözlərinə görə, karantin dövründə daşınmayan sərnişinlərin sayı müəyyən edilib: "Lakin biz dəymiş ziyanı pula çevirməmişik. Onu deyə bilərəm ki, metro bağlanandan bu günə qədər orta hesabla 29 milyon sərişin itirmişik". O qeyd edib ki, metropolitendə hər sərnişinin daşınması üçün sərf olunan rəqəm tez-tez dəyişir. Hazırda bir sərnişinin daşınması 52 qəpiyə başa gəlir. O, əlavə edib ki, metropolitendə bu müddət ərzində yalnız sərnişindaşıma fəaliyyəti dayandırılıb: "Bütün texniki yoxlanışlar aparılıb və metro fəaliyyətə tam hazırdır. Bütün görülən tədbirlər sıxılığın azalmasına, pandemiyanın yayılmasının qarşısını almağa yönəlib".