Moskvalılar və paytaxt qonaqları Yeni ili evdə keçirməli olacaqlar, çünki şəhərdəki bütün restoranlar bayram gecəsi üçün bağlı olacaq. Koronavirusla bağlı Rusiyada Yeni il ərəfəsində baş tutan bütün konsert proqramları və mədəni tədbirlərin ləğv olunacağı qeyd olunub. ONN media  ölkəmizdə mövcud vəziyyətlə əlaqədar olaraq Yeni il axşamı restoranların fəaliyyət göstərib-göstərməyəcəyini öyrənmək üçün aidiyyəti qurumlarla və müvafiq məkanlarla əlaqə saxlayıb. Bakı Şəhər İcra Hakimiyyətinin mətbuat xidmətinin rəhbəri İsrafil Kərimov bildirib ki, bu, Nazirlər Kabineti yanında Operativ Qərargahın qərarına əsasən müəyyən olunacaq: “Yeni il ərəfəsində konsert proqramlarının olub-olmayacağı verilən qərardan asılıdır. Onlar nə qərar qəbul edəcəksə, həmin qaydada hərəkət edəcəyik, hələlik hər hansı konkret tədbirin keçirilməsi gözlənilmir. Nazirlər Kabinetinin qərarını gözləyirik”. Nazirlər Kabinetinin mətbuat xidmətinin rəhbəri İbrahim Məmmədovla əlaqə saxlasaq da, bu barədə heç bir məlumat vermədi. Bəs restoranlar necə? “JW Marriott Absheron Baku”dan əldə etdiyimiz məlumata görə, martdan bəri fəaliyyəti dayandığı üçün Yeni il tədbirlərinin keçirilməsi planlaşdırılmır. “Quba Palace Hotel”in əməkdaşı isə bildirib ki, bu, həm ölkədəki vəziyyət, həm də koronavirus pandemiyasının gedişindən asılı olacaq. “Neolit”in administratorunun sözlərinə görə, bu, yaxın 10 gün ərzində bilinəcək. “Nar & Sharab” restoranından isə bu barədə heç bir məlumatları olmadıqlarını bildiriblər.(publika.az)