Azərbaycan Respublikasının Prezidenti İlham Əliyevin müvafiq sərəncamı ilə Emin Səhləb oğlu Məmmədov Azərxalça ASC-nin sədri vəzifəsinə təyin edilib. ONN media  xəbər verir ki, Emin Məmmədov tanınmış rəsssam Səhlab Məmmədovun oğlu, Azərbaycan Futbol Federasiyaları Assosiasiyasının (AFFA) baş katibi Elxan Məmmədovun qardaşıdır. O, eyni zamanda Heydər Əliyev Fondunun mədəniyyət və incəsənət məsələləri üzrə müşaviridir. Emin Məmmədov Azərbaycan mədəniyyətinin təbliğində və inkişafında səmərəli fəaliyyətinə görə Mədəniyyət Nazirliyinin Fəxri Fərmanı ilə təltif edilib. Emin Məmmədov 2012-ci ildə Azərbaycan Respublikası Prezidentinin Sərəncamı ilə "Əməkdar incəsənət xadimi” fəxri adına layiq görülüb. Azərbaycanda və Avropanın bir sıra ölkələrində çoxsaylı sərgilərin keçirilməsinə rəhbərlik edib. “Heydər Əliyev Fondu əməkdaşlarının təltif edilməsi haqqında” Azərbaycan Respublikası Prezidentinin 2019-cu il 6 may tarixli Sərəncamına əsasən Heydər Əliyev Fondunun 15 illiyi münasibətilə və Azərbaycanın ictimai və mədəni həyatında səmərəli fəaliyyətinə görə “Tərəqqi” medalı ilə təltif edilib. Emin Məmmədov 2020-ci ildə Rusiya Rəssamlıq Akademiyasının fəxri üzvü seçilib. Qeyd edək ki, Azərxalça ASC-nin keçmiş sədri Vidadi Muradov bir müddət əvvəl həbs olunub.(hit.az)