Bu gün Kapital Bankın bir neçə müştərisinə bank adından şübhəli mesaj gəlib.

ONN media bildirir ki, bu barədə Axar.az-a bank müştəriləri məlumat veriblər.

Bildirilib ki, özünü Kapital Bankın Müşahidə Şurasının sədri, Baş icraçı direktor Cəlal Ələkbər oğlu Qasımov kimi təqdim edən şəxs müştərilərdən bank kartının məxfi məlumatlarını istəyib. Məlumatın düzgün verilməyəcəyi təqdirdə isə kartın deaktiv olunacağı vurğulanıb.

Bankın mətbuat xidmətindən isə bildirildi ki, məsələ araşdırılır.

"Kapital Bank"ın İctimaiyyətlə Əlaqələr şöbəsinin rəisi Pərviz Sədrəddinov bildirib kİ, "Kapital Bank" mütəmadi olaraq müxtəlif sorğular keçirir: "Lakin bu sorğular hər hansı bir məhsul və ya xidmətlə bağlı, telefon zəngi vasitəsilə baş verir. Sorğu zamanı bankın rəhbərliyinin adından istifadə etmək və ya kart məlumatlarının tələb olunması yolverilməzdir. Ona görə də bu tip bildirişlərə qarşı müştəriləri diqqətli olmağa çağırırıq və heç bir halda kart məlumatlarını başqa şəxsə verməmələrini xahiş edirik. Əks halda onlar dələduzluq halı ilə üzləşəcəklər”.