“Azərbaycan hər zaman balanslı siyasət yürüdüb. Cənab Prezidentin bu gün Avropada NATO rəhbəri ilə görüşməsi, bu proseslərin inkişafı fonunda çox mühüm əhəmiyyət kəsb edir”.

ONN media bildirir ki, bunu "Ölkə.Az"a açıqlamasında millət vəkili Arzu Nağıyev Prezident İlham Əliyevin Brüsseldə NATO-nun baş katibi Yens Stoltenberq ilə gözlənilən görüşü barədə danışarkən bildirib. 

Onun sözlərinə görə, bu görüş əlaqələrin daha da inkişafına gətirib çıxaracaq. 

“Azərbaycanın heç bir hərbi blokda olmadığına baxmayaraq, istənilən istiqamətdə istər NATO-nun, istərsə də digər hərbi birləşmələrlə təlimlər keçirməyə və bu istiqamətdə müvafiq addımlar atmağa hazırdır. Bildiyimiz kimi Azərbaycan Türkiyə ilə qaqşılıqlı hərbi təlimlər keçirir. Türkiyə NATO-nun üzvüdür. Bundan başqa biz heç bir hərbi blokda olmasaq da, sadəcə, Qoşulmama Hərəkatında üzv olduğumuz üçün bu istiqamətdə çox ciddi addımlar atırıq”.

Deputat həmçinin bildirib ki, istər NATO standartlarına uyğun, istərsə də digər istiqamətdə biz ordu quruculuğunu daima inkişaf etdirəcəyik: 

“Vaxtilə NATO-nun Əfqanıstanda olan sülhməramlı missiyasında Azərbaycan iştirak edib və bu yüksək səviyyədə dəyərləndirilib. Ona görə də NATO-Azərbaycan münasibətləri çox mühüm məsələdir. Baxmayaraq ki, NATO və Rusiya arasında müxtəlif hərbi məsələlər fonunda gərginlik yaşanır, bunun Azərbaycana heç bir təsiri yoxdur. Çünki biz hər zaman balanslı siyasət yürütmüşük”.