"Vaşinqton nüvə silahından yalnız fövqəladə hallarda istifadə etməyi nəzərdən keçirəcək".

ONN media xəbər verir ki, bunu ABŞ dövlət katibi Entoni Blinken BMT-nin Nyu-Yorkdakı mənzil-qərargahında Nüvə Silahlarının Yayılmaması Müqaviləsində iştirak edən ölkələrin konfransında çıxışı zamanı deyib.

“Nüvə silahları mövcud olduğu müddətdə Amerika nüvə silahlarının əsas rolu ABŞ-a, müttəfiqlərimizə və tərəfdaşlarımıza qarşı nüvə hücumlarının qarşısını almaq olacaq. Birləşmiş Ştatlar nüvə arsenalından yalnız fövqəladə hallarda, öz həyati maraqlarını, eləcə də müttəfiqlərini və tərəfdaşlarını qorumaq üçün istifadə etməyi nəzərdən keçirəcək”, - Blinken deyib.

Bundan əvvəl Blinken KXDR-in yeni nüvə sınağı keçirməyə hazırlaşdığını iddia edib. ABŞ dövlət katibinin sözlərinə görə, Şimali Koreya qeyri-qanuni nüvə proqramını və regiona qarşı təxribatlarını genişləndirməkdə davam edir.

Qeyd edək ki, bundan öncə ABŞ xarici siyasət idarəsinin rəhbəri çərşənbə günü Senatın təsdiq etdiyi qətnaməyə və nüfuzlu Amerika siyasətçilərinin çağırışlarına baxmayaraq, Vaşinqtonun Rusiyanı terrorizmi himayə edən ölkə kimi tanımağa hələ hazır olmadığını deyib