Ötən gecə Bakıdakı xəstəxanada üç günlük körpə ölüb. ONN media bildirir ki, bu barədə Oxu.Az-a Səhiyyə Nazirliyinin baş pediatrı Nəsib Quliyev məlumat verib. O bildirib ki, hadisə K.Fərəcova adına Elmi Tədqiqat (ET) Pediatriya İnstitutunda baş verib: “Körpə bir günlük olarkən ağır diafraqma yırtığı diaqnozu ilə instituta daxil olub. Çox ağır vəziyyətdə olub. İkinci gün körpə əməliyyata alınıb. Həkimlərin bütün səylərinə baxmayaraq, onun həyatını xilas etmək olmayıb. Uşaq gecə saatlarında dünyasını dəyişib”. Baş pediatr bu vəziyyətlə əlaqəli xaos yaratmağın düzgün olmadığını dilə gətirib: “Bizə müxtəlif regionlardan ən ağır vəziyyətdə xəstələr gətirilir. Ölkədə ağır vəziyyətdə doğulan bütün körpələr bura gətirilir. Amma təəssüf ki, bəzilərinin həyatını xilas etmək mümkün olmur”.