Onun sözlərinə görə, bu günə qədər qeyd edilən istiqamətdə kifayət qədər fərqli mövqelər var idi və bu torpaqların satışından asılı olaraq bir sıra hallarda fərqli qiymətlər tətbiq olunurdu:

"Subyektiv meyarlar burada əsas rol oynayırdı, amma artıq bundan sonra bələdiyyə torpaqlarının satışı yalnız qiymətləndiricilər tərəfindən müəyyən edilən və bazar qiymətlərinə uyğun qiymətlərlə həyata keçiriləcək.

Düşünürəm ki, bu, qiymətlərdə müəyyən qədər də olsa dəyişikliyə gətirib çıxara bilər. Çünki faktiki olaraq bu və ya digər şəkildə bələdiyyə torpaqlarının daha aşağı qiymətə alınması halları var idi. Amma bu hallar müəyyən mənada aradan qalxacaq və eyni zamanda qiymətləndiricilərin xərcləri də məsələyə daxil olur. Alınan və satılan torpağın miqyasından asılı olaraq qiymətləndiricilərə ödənilən vəsait torpağın bir kvadratına düşən həcmin fərqli olmasına gətirib çıxarır. Yəni daha kiçik torpaqların qiymətləndirilməsi zamanı bu məqsədlə ayrılan ödəniş bir kvadrat üçün daha yüksək olacaqdır. Yəni bu, onu deməyə əsas verir ki, kiçik parsellərlə satılan torpaqlarda qiymətlər daha yüksək templə artım nümayiş etdirə bilər. Amma böyük parsellərlə satılan torpaqlara qiymətləndirici ödənişlərə ciddi təsir göstərməyə bilər, həmçinin bu mənbədən daxil olan vəsaitlərin həcminin artmasına gətirib çıxaracaqdır.

Çünki dediyimiz kimi, subyektiv amillərin aradn götürülməsi və bazar prinsiplərinin əsas götürülməsi müvafiq daxilolmaların həcminə pozitiv istiqamətli təsir göstərəcəkdir. Amma bununla yanaşı, düşünmürəm ki, yeni müvafiq mexanizm bazarda qiymətlərin yüksəlməsi istiqamətində ciddi təsir göstərsin. Sadəcə, müəyyən mənada bu istiqamətdə subyektiv maraqları təmin etmək məqsədilə ortaya qoyulan cəhdlər aradan qalxa bilər".