"Ermənistan dövləti uzun müddətdir ki, işğalçılıq siyasətini davam etdirir. Amma Ümummilli Lider Heydər Əliyev Azərbaycanda hakimiyyətə gəldikdən sonra Ermənistanı bütün regional layihələrdən kənarda qoydu. Azərbaycan Prezidenti İlham Əliyev də bu siyasəti uğurla davam etdirir".

ONN media xəbər verir ki, bunu  Tərxis Olunmuş Hərbçilərin Gəncləri Maarifləndirmə İctimai Birliyinin (TOHGMİB) sədri, hərbi ekspert Emin Həsənli deyib.

Onun sözlərinə görə, Ermənistan beynəlxalq hüququn norma və prinsiplərini pozur və BMT Təhlükəsizlik Şurasının qərarlarına əməl etmir: "Bu gün dünyada işğalçılıq, separatizm, terrorizm və s. ən dəhşətli cinayətlər sayılır. Bu cinayətlərin hamısını Ermənistan törədib. Əgər işğalçı ölkə bu siyasətindən əl çəkməsə, Ermənistanda vəziyyət daha da gərginləşəcək. Bu gün əhali durmadan Ermənistandan köçüb gedir. Ermənistanda kimin hakimiyyətdə olmasınan asılı olmayaraq vəziyyət daha da dərinləşəcək. Onların yeganə yolu işğal etdikləri Azərbaycan torpaqlarını azad etməkdir. Torpaqlarımızda ikinci bir dövlətin yaranmasına Azərbaycan imkan verməyəcək. 2016-cı ilin aprel döyüşləri Ermənistan üçün bir dərs idi. Bu dəfəki zərbə isə daha artıq olacaq. Bu gün Azərbaycanın müasir ordusu var. Azərbaycan dövləti tərəfindən uzun müddətdir ki, şəhid ailələrinə, əlillərə və s. evlər, avtomobillər verilir. Bu proseslər bundan sonra da davam edəcək".