Xəzər dənizinin Su bioloji resurslarının mühafizə olunması, səmərəli istifadəsi və onların birgə ehtiyatlarının idarə olunması üzrə Komissiyanın bu ilin noyabr ayında keçiriləcək ikinci sessiyasında Xəzər dənizində brakonyerliyə qarşı birgə mübarizənin aparılması məqsədilə Xəzəryanı ölkələr arasında protokol imzalanacaq.

Bunu ONN media-ya Ekologiya və Təbii Sərvətlər Nazirliyinin (ETSN) Elmi-Tədqiqat Balıqçılıq Təsərrüfatı İnstitutunun direktoru Mehman Axundov deyib.

M.Axundovun sözlərinə görə, həmin protokol əsasında Xəzəryanı ölkələrin hüquq-mühafizə orqanları, sərhəd qoşunları brakonyerliyə qarşı birgə tədbirlər həyata keçirəcəklər.

İnstitut direktoru qeyd edib ki, nərəcinsli balıqların populyasiyasının artımına nail olmaq üçün onların qanunsuz ovunun da qarşısı alınmalıdır. Bunun üçün isə regional səviyyədə birgə səylər göstərilməli, Xəzəryanı ölkələrin hüquq-mühafizə orqanları birgə əməkdaşlıq etməlidir.

M.Axundov əlavə edib ki, ikinci sessiyada Xəzərdə nərəcinsli balıqların sənaye ovuna moratoriumun qoyulması barədə hökumətlərarası saziş layihəsinin sonuncu variantının təqdim ediləcəyi də gözlənilir.

ETSN rəsmisi qeyd edib ki, 2010-cu ilin noyabr ayında Bakıda keçirilmiş Xəzəryanı ölkələrin dövlət başçılarının 3-cü zirvə görüşündə hökumətlərə nərəcinsli balıqların sənaye ovuna moratoriumun qoyulması barədə hökumətlərarası sazişin hazırlanması tapşırılmışdı: “Xəzər dənizinin Su bioloji resurslarının mühafizə olunması, səmərəli istifadəsi və onların birgə ehtiyatlarının idarə olunması üzrə Komissiya 2010-cu ilin sonunda keçirilən sessiyada belə bir qərar çıxardı ki, Xəzəryanı ölkələr həmin saziş imzalana qədər texniki moratorium tətbiq etsin. Bu, o deməkdir ki, dövlətlərarası saziş olmasa da, biz bir-birimizə bu balıqları ovlamamaq barəsində söz vermişik. Bu balıqlar yalnız balıqartırma məqsədləri, qismən, yəni çox kiçik həcmdə də elmi-tədiqat məqsədləri üçün ovlana bilər. 2011-ci ildən başlayaraq, Xəzəryanı ölkələr moratoriumun müddətini hər il uzadır. Hökumətlərarası saziş imzalandıqdan sonra isə artıq moratoriumun qoyulması rəsmi şəkildə olacaq”.