ONN İnformasiya Agentliyi

Yunus Oğuzun “Ovçu” romanı dövlət mükafatına təqdim olundu

Yunus Oğuzun “Ovçu” romanı dövlət mükafatına təqdim olundu
29 Aprel 2020 - 16:51

Azərbaycan Respublikasının Elm, texnika, memarlıq, mədəniyyət və ədəbiyyat üzrə Dövlət Mükafatları Komissiyası 2020-ci il üçün təqdim olunan işlərin siyahısını açıqlayıb.

Siyahıda ədəbiyyat sahəsi üzrə yazıçı, publisist, “Olaylar” İnformasiya Agentliyinin baş redaktoru Yunus Oğuzun “Ovçu” romanı da yer alıb. Roman 2016-cı ildə baş vermiş aprel döyüşlərində qəhrəmancasına həlak olan Milli Qəhrəman Murad Mirzəyevin döyüş yoluna  həsr olunub.

Roman haqqında ədəbi tənqidçilər, ictimai xadimlər dəyərli fikirlərini səsləndiriblər. Akademik Nizami Cəfərov roman haqda fikirlərini bölüşərkən bildirib ki, “Ovçu”  tarixi romanı yazıçının kitablarının ən yaxşısıdır və Yunus Oğuzun tarixi kitablarının hamısında dəqiq faktlar var.

YAP Siyasi Şurasının üzvü Qafar Əliyev vurğulayıb ki, vətənpərvərlik mövzusunda “Ovçu” kimi tarixi romanlara böyük ehtiyac var və yaxşı olardı ki, bu roman bir çox dillərə tərcümə edilsin.

Mətbuat Şurasının sədri Əflatun Amaşov bildirib ki, Yunus Oğuzun təqdim etdiyi “Ovçu” adlı tarixi romanda həqiqətlər əks olunub. Kitab 2016-cı ildə baş vermiş aprel döyüşlərindən bəhs edir. Həmin hadisələr milli şüurumuzu yenidən oyatdı.

AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli qeyd edib ki, “Ovçu” romanı Azərbaycan gerçəklikləri əsasında yazılıb və Yunus Oğuz müstəqillik dövrü Azərbaycan tarixi romanının əsas yaradıcılarından biridir.

“Ovçu” kitabının redaktoru, yazıçı  Elçin Hüseynbəyli vurğulayıb ki, Yunus Oğuzun “Ovçu” romanında əsl Azərbaycan qəhrəmanı obrazı yaradılıb. Bu obrazlar gənclərimiz üçün bir nümunədir.

AMEA-nın müxbir üzvü Tehran Əlişanoğlu qeyd edib ki, “Ovçu” romanında  tarixi məqamlara müasir baxışdan yanaşılıb. Bu əsəri Yunus Oğuzun uğuru kimi qəbul etmək lazımdır.

Dünya Azərbaycanlıları Milli Birlik Təşkilatının prezidenti Cavad Derəxti bildirib ki, əsərdə əksini tapmış qəhrəman obrazı əlli milyonluq azərbaycanlının təmsilçisidir. İstərdim ki, kitab əski əlifbaya çevrilib Güney Azərbaycanda da yayılsın.

“Ovçu” romanı Özbəkistanın paytaxtı Daşkənd şəhərində də oxuculara təqdim edilib. Romanı özbək dilinə tərcümə edən filoloq alim Gülbahar Aşurova qəhrəmanlıq və vətənpərvərlik mövzusunda yazılan “Ovçu” romanında yaradılan obrazların gənclərimiz üçün bir nümunə olduğunu qeyd edib, kitabın təbliğinin gənclərin vətənpərvərlik ruhunun inkişafında müsbət rol oynayacağını söyləyib.

Bundan əlavə roman türk dilinə də tərcümə olunub.

ONN İnformasiya Agentliyi
image_printÇap Et
OXŞAR XƏBƏRLƏR
Şərhlər
Şərh yoxdur
XƏBƏR LENTİ
ONN-agentlik.png ONN-agentlik.png ONN-agentlik.png ONN-agentlik.png ONN-agentlik.png ONN-agentlik.png