Ermənistan prezidentinin istefasının açıq-aşkar geosiyasi mənası var və bu hadisələrin sonrakı inkişafı hakimiyyətin tamamilə dəyişməsinə gətirib çıxara bilər.

ONN media bildirir ki, bunu “Ermənistan” müxalifət blokunun deputatı Artur Kazinyan Feysbukda yazıb. O bildirib ki, Armen Sarkisyanın prezidentlikdən getməsinin geosiyasi çalarları var.

Onun sözlərinə görə, istefanın niyə indi və bazar günü axşam elan edildiyi aydın deyil.

“Bir neçə gün əvvəl Sarkisyan 200 MVt gücündə günəş stansiyası üçün BƏƏ-dən maliyyə alıb və bildirilib ki, bu, hələ başlanğıcdır. Hadisələr çox sürətlə inkişaf edir və istefanın aşkar geosiyasi çalarları var”, - Kazinyan bildirib.

Qeyd edək ki, digər politoloq və ekspertlər də Armen Sarkisyanın istefası üçün ölkədə hər hansı zəminin olmadığından bunu çox müəmmalı hesab edirlər.  Politoloqlar vurğulayır ki, Sarkisyan Ermənistanı qarşıda gözləyən xoşagəlməz qərarları bölüşməməsi üçün belə bir addım atıb.

Erməni ekspertlərin fikrincə, bu, sülh müqaviləsi, Azərbaycanın ərazi bütövlüyünün tanınıb, normal münasibətlərin qurulması üçün Qarabağdan imtinası kimi məsələlər ola bilər.