İtaliyanın şimalındakı Pyemont vilayətində polisin keçirdiyi antiterror əməliyyatı nəticəsində daha bir nəfər saxlanılıb.

ONN media xəbər verir ki, Kuneo şəhərində 19 yaşlı mərakeşli İlyas Haduz saxlanılıb.

Qeyd olunur ki, həmin şəxs sosial şəbəkələrdə ekstremist çağırışlar etməkdə ittiham edilir. Aparılan axtarışlar nəticəsində İ.Haduzun silahların və partlayıcı maddələrin hazırlanması barədə videolara baxdığı da məlum olub.

Xatırladaq ki, ötən gün İtaliyada keçirilən əməliyyat nəticəsində Berlin terrorçusu Anis Amri ilə əlaqədə şübhəli bilinən 5 nəfər saxlanılmışdı.

Həmin şəxslərin saxlanılması üçün Romada, eləcə də Neapol və digər şəhərlərdə axtarışlar aparılıb.

Həmin terror şəbəkəsinin Roma metropolitenində terror aktı həyata keçirmək planları üzə çıxıb.