ABŞ prezidenti Donald Trampla Şimali Koreya lideri Kim Çen In arasında iyun ayında Sinqapurda baş tutan zirvə barədə yeni iddia ortaya atılıb.

ONN media xəbər verir ki, Tramp görüşdə Koreya müharibəsinin qanuni olaraq sona çatmasını ehtiva edən sülh razılaşmasını imzalamaq sözü verib.

İddia ABŞ-ın “Voks” xəbər saytında yer alıb. Lakin zirvənin ardınca bu razılaşmanı imzalayacağını söz verən Tramp görüşdən aylar ötməsinə rəğmən vədinə hələ də əməl etməyib. Bu isə Pxençan hökumətinin ümidlərini puça çıxarıb və onlar da nüvə silahlarından istifadə etməməyə dair verdikləri sözü pozublar.

Məsələ ilə bağlı “Voks”a açıqlama verən ABŞ Xarici İşlər Nazirliyi Şimali Koreyanın nüvə silahlarından təmizlənməsi təqdirində yarımadada sülhə dair bütün diplomatik təşəbbüslərə ABŞ-ın qapılarının açıq olduğunu bildirib.

Ağ Evdən isə hələ ki, iddia ilə bağlı açıqlama verilməyib.

Qeyd edək ki, Donald Tramp ilə Kim Çen In 12 iyunda Sinqapurda ilk dəıfə görüşmüş, zirvənin ardınca liderlər Şimali Koreyanın nüvə silahlarından təmizlənməsi mövzusunda razılığa gəlmişdi. Lakin bir müddət sonra ABŞ Şimali Koreyanın nüvə silahlarından vaz keçmədiyini iddia etmişdi.

Cənubi Koreya ilə Şimali Koreya arasındakı vətəndaş müharibəsi 1953-cü ildə imzalanan atəşkəslə başa çatsa da, sülh razılaşması imzalanmadığı üçün müharibə de-yure olaraq hələ də davam edirmiş kimi qəbul edilir.