Ukrayna hərbi metodlara qaçmadan Krım və Donbas üzərində nəzarəti bərpa edəcək. Regionlar xüsusi siyasi-diplomatik yolla qaytarılacaq.

ONN media Publika -ya istinadən xəbər verir ki, bu haqda Ukrayna Xarici İşlər Nazirliyinin bəyanatında deyilir.

Nazirlik bununla da Rusiyanın Xarici İşlər Nazirliyinin başçısı Sergey Lavrovun sözlərinə reaksiya verib. İdarədən bildiriblər ki, əslində Rusiya hücuma hazırlıq görür. Məlumata görə, Ukrayna ilə sərhədə 80 mindən çox Rusiya hərbçisi, yüzlərlə tank və “İskəndər” raket kompleksləri cəmlənib.

Daha əvvəl “Komsomolskaya Pravda” radiosunun efirində Rusiyanın xarici işlər naziri bildirib ki, Ukrayna prezidenti Pyotr Poroşenko Rusiyayla sərhəddə təxribat hazırlayır.

O dəqiqləşdirib ki, alınmış informasiyaya əsasən, söhbət dekabrın sonuna nəzərdə tutulmuş silahlı təxribatdan gedir. Nazir qeyd edib ki, Poroşenko lazımı cavabı alacaq.

Lavrov həmçinin vurğulayıb ki, Kiyev belə addımları “Qərb kuratorları və qəyyumları ilə” uyğunlaşdırır. Rusiya xarici siyasət idarəsinin başçısı söyləyib ki, əldə edilən məlumatlara görə, Poroşenkoya kiçik intensivli döyüş hərəkətlərini dəstəkləməyi məsləhət görürlər. Lavrov qeyd edib ki, məqsəd Rusiyanı Ukraynaya hərbi təcavüzdə ittiham etmək yönündə təbliğatın aparılması üçün əsaslar yaratmaqdır.