Metronun "Nizami" stansiyasında bir nəfər özünü qatarın altına atıb.

“Bakı Metropoliteni" Qapalı Səhmdar Cəmiyyətinin mətbuat xidmətinin rəhbəri Bəxtiyar Məmmədov ONN media-ya bildirib ki, hadisə bu gün 11:40 radələrində baş verib.

“1968-ci il təvəllüdlü Tərlan Yusifov qatar platformaya daxil olanda özünü relslərin üzərinə atıb. Lakin o, iki relsin arasına düşüb. Dərhal təmas relslərində gərginlik dayandırılıb. Sərnişin oradan çıxarılaraq təcili tibbi yardım briqadalarına təhvil verilib”.

B.Məmmədovun sözlərinə görə, hadisə nəticəsində T.Yusifov ciddi xəsarət almayıb: “Təcili yardım həkimlərinin də rəyində qeyd edilir ki, relslərin arasına düşsə də, o, ciddi xəsarət almayıb. Müayinə zamanı onun bədənində spirt aşkarlanıb. Stansiyadakı videokameralardakı görüntüdən də onun qaçaraq özünü relslərin üzərinə atdığı aydın görünür”.

B.Məmmədov bildirib ki, bu hadisə ilə əlaqədar “Elmlər Akademiyası” stansiyasında qatarın hərəkətinə mövcud intervaldan 4 dəqiqə artıq fasilə verilib: “Lakin tədbirlər planına əsasən, qısa zamanda qatarların əvvəlki qrafik üzrə hərəkəti təmin edilib”.