Gürcü infeksionistlər martda ölkədə qrip virusuna yoluxma hallarının artacağını istisna etmirlər. ONN media xəbər verir ki, bunu Gürcüstanın ictimai sağlamlıq və xəstəliklərlə mübarizə mərkəzinin rəhbəri Amiran Qamkrelidze bildirib. Dekabr-yanvar aylarında Gürcüstanda H1N1 virsuna (“donuz qripi”) yoluxanların sayı xeyli artmış, xəstəlikdən ölənlərin sayı 22 nəfərə çatmışdı. Hazırda yoluxma halı azalsa da, virus aktivliyini qoruyur. Sonuncu məlumatlara görə, xəstələrin sayı hər 100 min nəfərə 100 nəfər təşkil edir. Hər 100 min nəfərə 450 yoluxma halı qeydə alınarsa, bu artıq epidemiya hesab olunur. Qamkrelidze vurğulayıb ki, yeni qrip dalğası martda özünü göstərəcək. O, insanları gigiyena qaydalarına əməl etməyə və ehtiyatlı olmağa çağırıb.