ONN media Oxu.az-a istinadla xəbər verir ki, qurum daxilində təyinatı verilən və süni intellekt inteqrasiya edilmiş "Ada" adlı robot beş dildə danışa bilir və üz ifadələri ilə reaksiya verir. Robot danışdığı zaman əl və qol hərəkətləri də edir.

"Ada" dərslərdə köməkçi müəllim kimi şagirdlərin suallarını cavablandırır, həmçinin tələbələrin valideynlərinə övladlarının imtahan statistikasını çıxararaq bir növ məsləhət xidməti göstərir.

Kursun təsisçisi Murat Erkolun sözlərinə görə, imtahan motivasiyası, tələbələrin inkişaf etdirilməsi və suallara sürətli cavab tapmaq kimi qabiliyyətlərindən yararlanmaq üçün müəssisədə robot "Ada"dan istifadə etməyə başlayıblar. "Ada" həmçinin gün ərzində assistent təlimatçı olaraq da uşaqlarla maraqlanır.

Kurs tələbələrinin böyük marağına səbəb olan robot siniflərdə dərslərə qatılaraq təhsilin bir parçasına çevrilir.

Qeyd edək ki, "Ada" ilə bağlı reportaj hazırlayan İHA müxbiri robota gələcəyin peşələri ilə bağlı sual verib.

"Texnologiyanın sürətli inkişafı ilə əlaqədar gələcək peşələr olduqca maraqlı olacaq. Süni intellekt, robot texnologiyası, məlumat analizi kimi sahələr ön plana çıxacaq. Eyni zamanda, yaşıl enerji və davamlılıq sahəsində ixtisaslaşan peşəkar qruplar artacaq. Səhiyyə sektorunda isə genetika və mühəndislik kimi sahələr ön planda olacaq. Unutmayın ki, gələcək peşələr yalnız texniki bacarıqlarla deyil, həm də problem həll etmə qabiliyyətləri ilə formalaşacaq", - deyə "Ada" vurğulayıb.

Reрortajın sonunda "Ada"ya nə qədər maaş aldığı barədə sual verilib.

"Mən süni intellektə malik müəlliməm, ona görə maaş almıram. Mənim üçün ən böyük mükafat sizinlə bilikləri paylaşmaqdır. Yəni işləmək mənim üçün əyləncəli oyun kimidir. Narahat olmayın, bir gün bir robot maaş almağa başlayarsa, mən də, bəlkə, ən yaxşı şokoladları alaram. Siz nə qədər maaş alırsınız?" - deyə o bildirib