Ötən həftə sonuncu ABŞ əsgərlərinin bölgədən çıxarılması ilə ABŞ-ın Əfqanıstandakı 20 illik varlığı sona çatdı. ABŞ-ın respublikaçı senatoru Lindsey Graham mövzu ilə əlaqədar açıqlamalar verərək, Amerika ordusunun yaxın gələcəkdə Əfqanıstana dönə biləcəyini söyləyib.

ONN media xəbər verir ki, senator Baydenin geri çəkilmə əməliyyatı ilə əlaqədar bütün tövsiyələrə məhəl qoymadığını iddia edərək, ABŞ-ın Əfqanıstana qayıtmaqdan başqa çarəsi olmadığını söyləyib.

"Başqa çarəmiz yoxdur, Əfqanıstana qayıdacağıq" - L.Graham qeyd edib.

Vaşinqton idarəçiliyinin həqiqətən taliblərin de-fakto nəzarəti altında olan ölkəyə qayıtmaq istəyəcəyi ilə bağlı suala Graham belə cavab verib: "Terror təhlükəsi artacağı üçün sonda məcbur olacağıq. Bu bölgə ekstremist qruplar üçün cəlbedicidir. Əl-Qaidə terrorçuları oranı sığınacaq halına gətirə bilər".

Tarixi geri çəkilmə problemi səbəbiylə ABŞ Prezidenti Co Baydenin vəzifədən getməsini tələb edən Graham, 11 sentyabr hadisəsinin təkrarlana biləcəyinindən narahatlığını ifadə edib.