Türkiyə prezidenti Rəcəb Tayyib Ərdoğanın dekabrın 3-də Rusiya lideri Vladimir Putinlə telefon danışığı aparacağı və bu danışıqlarda Ukraynadakı vəziyyətə toxunulacağı gözlənilir. 

Bunu NATO xarici işlər nazirlərinin toplantısının keçirildiyi Riqada Türkiyənin xarici işlər naziri Mövlud Çavuşoğlu bildirib.

“Biz iki tərəflə (Rusiya və Ukrayna) əlaqə saxlayırıq və gərginliyin azaldılmasının tərəfdarıyıq. Bu yaxınlarda mən rusiyalı və ukraynalı həmkarımla danışıqlar apardım. Cümə günü prezidentimiz Putinlə danışıqlar aparacaq”, – Çavuşoğlu deyib.

Nazir əlavə edib ki, sanksiyalar problemi həll etməyəcək: “Bir sıra ölkələrə qarşı sanksiyaların necə tətbiq edildiyini gördük, bəzən özümüz də sanksiyaların hədəfinə çevrildik, amma bu, problemi həll etmir. Məsələn, biz sanksiyalar əvəzinə çəkindirməni seçiriksə, bu, məqsədyönlü olmalıdır. Amma biz Türkiyə olaraq düzgün balanslaşdırılmış dialoqa inanırıq. Ona görə də Ukraynaya və ya başqa bir ölkəyə yalnız sanksiyalar tətbiq etməklə kömək etmək mümkün olmayacaq”.