Ukrayna Prezidenti Vladimir Zelenski ilə Böyük Britaniyanın Baş naziri Boris Conson arasında telefon danışığı baş tutub.

Bu barədə “Downing Street” məlumat yayıb.

Telefon danışığı zamanı Zelenski bildirib ki, növbəti 24 saat Ukrayna üçün kritik olacaq.

Boris Conson Qərbin hərbi yardımının Ukraynaya çatmasını təmin etmək üçün əlindən gələni edəcəyinə söz verib.

“Baş nazir Böyük Britaniyadan və onun müttəfiqlərindən Ukraynaya müdafiə yardımının axınını təmin etmək üçün əlindən gələni edəcəyini söylədi”- məlumatda deyilir.

Conson həmçinin hazırkı vəziyyətdə “Ukrayna xalqının cəsarətini və prezident Zelenskinin rəhbərliyini yüksək qiymətləndirib”.

“Liderlər yaxın təmasları davam etdirməyə razılaşdılar və Baş nazir Böyük Britaniyanın Ukraynanın suverenliyinə güclü dəstəyini bir daha təsdiqlədi”, - Baş nazirin ofisindən bildirilib.

Conson onu da əlavə edib ki, ölkəsi Ukraynaya əlavə 40 milyon funt sterlinq köçürəcək. Bu pul ukraynalılar üçün tibbi ləvazimatlara yönəldiləcək.