Bazar ertəsi dollar ucuzlaşmaqda davam edib.

Buna səbəb investorların satış təzyiqlərini artırması, Çindəki məhdudiyyətlərin yumşaldılmasının qlobal böyüməyə və ixracatçıların valyutalarının möhkəmlənməsinə yol açacağı ilə bağlı düşüncələri olub.  

May ayının ortalarına qədər 12 ay ərzində təqribən 16% artaraq son iyirmi ilin ən yüksək səviyyəsinə çatan ABŞ dolları indeksi 0,23% geriləyərək 102,680 səviyyəsinə enib və bir həftə ərzində təqribən 2% dəyər itirib.

Sözügedən dövrdə avro və yen də bahalaşma nümayiş etdirib. Belə ki, Yaponiya valyutası 0,4% bahalaşaraq bir dollar üçün 127,35, avro isə dollara qarşı ötən həftə 1,5% bahalaşdıqdan sonra 0,2% artaraq 1,0586 dollar olub.

Təhlükəsiz sığınacaq hesab edilən İsveçrə frankı da bahalaşaraq 2020-ci ilin martından bəri ən yaxşı həddə - 1 dollar üzrə paritet məzənnədən 0,9716 səviyyəsinə yüksəldi.

Çinin pul vahidi yuan isə ötən həftə 2020-ci ilin sonundan bəri ən yaxşı həftəsini yaşadı və bazar ertəsi bir dollar üçün 6,6844 həddinə qədər möhkəmləndi.

Kanada dolları isə keçən həftə ardıcıl üçüncü həftə yüksəldi və bazar ertəsi təqribən 0,4% artaraq bir dollar üçün 1,2800 Kanada dolları oldu.