ONN media xəbər verir ki, mövzu ilə bağlı Yenisabah.az-a danışan iqtisadçı-ekspert Natiq Cəfərli bildirib ki, ümumiyyətlə son zamanlar DSMF-nin fəaliyyəti ilə bağlı tənqidlər geniş vüsət alıb:

“DSMF-nin fəaliyyəti ilə bağlı çoxlu sual və tənqid var. Son zamanlar doğrudan da təqaüdlərin gecikdirilməsi ilə bağlı çoxsayılı şikayətlər özünü göstərir. Bu şikayətlərin əsası ondan ibarətdir ki, DSMF pul köçürmələri ilə bağlı öhdəliyini vaxtlı-vaxtında həyata keçirə bilmir. DSMF rəsmilərinin yanaşması odur ki, bu texniki problemdir və yaxın zamanlarda həll olunacaq. Lakin söhbət ondan gedir ki, ilin əvvəlində büdcə qəbul olunduqdan sonra minimum təqaüdlərdə 10 faizə yaxın artım nəzərdə tutuldu”.

Ekspertin fikrincə, təqaüdlərin gecikməsi texniki nasazlıqla bağlıdır:

“Bu DSMF-nin və Əmək və Əhalinin Sosial Müdafiəsi Nazirliyinin səhvidir ki, vaxtı-vaxtında bu hesablamaları aparıb Maliyyə Nazirliyinə və hökumətin digər qurumlarına məlumat verə bilmir. Yeni maliyyə mənbələrinin vaxtında köçürülməsinə və insanların bundan əziyyət çəkməməsinə şərait yaradılmalı idi. Təəssüf ki, biz bunu görmədik. Nəticə etibarı ilə, həmin qurumların səhlənkarlığı insanların narazılığına səbəb olur. Düzdü, bu sadəcə texniki məsələdir və insanların təqaüdləri ödəniləcək. Sadəcə çatışmayan vəsaitin Maliyyə Nazirliyi tərəfindən ayrılması və DSMF tərəfindən idarə olunması tezləşdirilməli və sürətləndirilməlidir