ONN media Olaylar-a istinadla xəbər verir ki, Xırdalan 2 saylı tam orta məktəblə bağlı iddialar bitmək bilmir. Ən son valideynlərdən biri şərəf lövhəsi üçün 20 manat pul yığıldığını iddia etmişdi.

Sosial şəbəkədə paylaşım edən valideyn 20 manat ödəmədiyi üçün övladının şəklinin şərəf lövhəsinə vurulmadığını qeyd etmişdi.

Məsələ ilə bağlı məktəbin direktoru isə deyilənləri qəbul etmir. Lakin məktəbdəki rüşvətxorluqla bağlı valideynlər tərəfindən yeni iddialar səslənib. Valideynlərin sosial şəbəkədə paylaşımından belə məlum olub ki, adı keçən məktəbdə övladlarının birinici yaxud ikinci növbə dərs alması üçün onlardan pul tələb olunur. Həmçinin fond pulu adı ilə də şagirdlərdən 30 manat tələb olunduğu söylənilib. Valideynlərlə yanaşı müəllimlərində narazılığı çoxdur. Belə ki, onlar məktəbdə dərs yükünün də pul qarşılığında artırıldığını söyləyiblər.

Qeyd edək ki, valideyn şagirdin səhər növbəsində təhsil alması üçün 1200AZN, istədiyin sinfi təyin etmək üçün isə 500AZN pul tələb olduğunu iddia edib.