Bir neçə ay öncə yanaraq külə dönən "Diqlas" ticarət mərkəzinin söküntüsü artıq yekunlaşıb.

ONN media bildirir ki, artıq söküntü işlərinin yekunlaşması ilə əlaqədar olaraq ərazidə təmizlik işlərinə başlanılıb.

Qeyd edək ki, Fövqəladə Hallar Nazirliyi tərəfindən həyata keçirilən söküntü işləri zamanı ərazidən çınqıl, daş və dəmir materiallar çıxarılıb. Xatırladaq ki, bu ilin martın 26-da paytaxtın Nizami rayonu ərazisində yerləşən böyük ticarət mərkəzlərindən biri olan və 2 hektar ərazisi olan "Diqlas" ticarət mərkəzində yanğın baş vermişdi. Nəticədə 400-dən artıq şəxsə maddi ziyan dəymişdi. Prezidentin sərəncamına əsasən, yanğınla bağlı komissiya yaradılıb, zərərçəkmişlərə maddi yardım məqsədilə ölkə başçısının ehtiyat fondundan İqtisadiyyat Nazirliyinə ilkin olaraq 3 milyon manat vəsait ayrılıb və yanğından zərərçəkənlərə kompensasiya ödənilib.