Türkiyənin Elazığ şəhərində yenidən zəlzələ olub. ONN media xəbər verir ki, Sivricə bölgəsində yerli vaxtla 12:31-də 4 bal gücündə yeraltı təkanlar qeydə alınıb. Təxminən bir saat sonra Sivricədə yenidən 3,5 bal gücündə zəlzələ olub. Yerli vaxtla saat 14:26-da Manisanın Qırxağac bölgəsində 5,1 bal gücündə yeraltı təkanlar qeydə alınıb. Sarsıntı İstanbul, İzmir, Bursa kimi bir çox şəhərdə hiss olunub. Qeyd edək ki, bölgədə 25 yanvarda 6,8 ballıq zəlzələ olmuşdu. Çox sayda insan dağıntılar altında qalmış, minə yaxın sakin xəsarət almışdı.