Aprel əməliyyatları irimiqyaslı olmasa da, mühüm nailiyyətlər əldə edildi. İşğaldan azad edilən Lələtəpə və Talış yüksəklikləri ordumuzun düşmən qarşısında strateji üstünlüyü artırması baxımından vacib rol oynadı. ONN media xəbər verir ki, bu sözləri açıqlamasında ehtiyatda olan polkovnik Şair Ramaldanov Aprel döyüşləri barədə danışarkən deyib. Polkovnik qeyd edib ki, Aprel döyüşlərində ermənilərin milli qürur mənbəyi olan “Ohanyan xətti” darmadağın edildi: “Qarabağ müharibəsindən sonra ermənilər Azərbaycan Silahlı Qüvvələrinin əks hücumlarının qarşısını almaq məqsədilə bir çox yerdə güclü istehkamlar qurmağa başladılar. Bunların arasında ən möhkəmi Talış və Lələtəpə istiqamətindəki “Ohanyan xətti” idi. Bu məntəqə ermənilər üçün “milli qürur mənbəyi” sayılırdı. Ermənilər “Ohanyan xətti”nin aşılmaz olduğunu düşünürdülər. Aprel döyüşlərinin 2-ci günü ordumuz çox asan bir şəkildə bu xətti yardı. Ardınca isə Lələtəpə və Talış yüksəklikləri ordumuzun nəzarətinə keçdi”. Ekspert vurğulayıb ki, Aprel döyüşləri düşmənə çox böyük psixoloji, hərbi-iqtisadi və siyasi zərbə vurdu: “Azərbaycan Silahlı Qüvvələri əldə etdiyi uğurlarla Ermənistan qarşısında həm hücum, həm də müdafiə üstünlüyünü artırdı. Düşmən tərəfi isə ordumuzun hər an əks-hücuma keçə biləcəyini görmüş oldu. Bu əməliyyatlarda ordumuz sürətli və kordinasiyalı hücum əməliyyatı aparmaq iqtidarında oluğunu nümayiş etdirdi”.(axar.az)