"Xeyli sayda məmurlarımız dili yaxşı bilmədiyinə görə cəmiyyətdə qınaq obyektinə çevrilib".

Bunu AMEA-nın Nəsimi adına Dilçilik İnstitutunun Monitorinq şöbəsinin aparıcı elmi işçisi, dilçi alim Şahlar Göytürk deyib. Ekspert sözügedən problemin aradan qaldırılması üçün məmurların dil imtahanından keçirilməsini təklif edib:

“Bunun yeganə yolu yaxın gələcəkdə Azərbaycan dilini bilməyən, bu dildə yaxşı danışa bilməyən şəxslərin yüksək postlara təyin olunmamasıdır. Heç kimə sirr deyil ki, bu bir Azərbaycan reallığıdır və problemin həlli üçün müəyyən qədər vaxt lazımdır. Əgər sən bu cəmiyyətdə bu ölkədə yaşayırsansa, vəzifə tutursansa, dili mənimsəməlisən. Ona görə də cəmiyyət Azərbaycan dilinə, kökünə, mədəniyyətinə bağlı olmayan insanların yüksək vəzifədə olmasını istəmir. Hələlik bu barədə qanunvericilikdə müddəa yoxdur. Fikirləşirəm ki, yaxın gələcəkdə ya yüksək vəzifələrə təyin olunan məmurlar Azərbaycan dilindən imtahan verməli, ya da dövlətçilik şüuru formalaşdıqca bu məmurlar da öz üzərlərində işləməlidir. Əks halda dili bilməmək indi olduğu kimi ictimai qınaqlara gətirib çıxaracaq”.mediapost