Gürcüstanın Baş Naziri Giorgi Qaxariya Dağlıq Qarabağ ətrafındakı mövcud vəziyyətə münasibət bildirib. ONN media xəbər verir ki, Baş Nazir tərəflərə münaqişənin həlli üçün Tbilisidə danışıqlar aparmağı təklif edib. “Azərbaycanla Ermənistan arasında növbəti hərbi qarşıdurma nəticəsində çətin vəziyyət yaranıb, ağır itkilər var və təəssüf ki, hərbi əməliyyatların dayandırılması və dialoqun bərpası hələ ki, mümkün deyil. Hamımız başa düşürük ki, vəziyyətin daha da gərginləşməsi bütün bölgənin təhlükəsizliyinə son dərəcə mənfi təsir göstərəcək. Bir daha ATƏT-in Minsk Qrupu həmsədrlərini və beynəlxalq iştirakçıları eskalasiyanı dayandırmaq və dialoqu davam etdirmək üçün imkanlarından maksimum dərəcədə istifadə etməyə çağırırıq”,- deyə Qaxariya vurğulayıb. O, bölgədə ən qısa müddətdə sülh qurmağın ümumi maraqlara uyğun olduğunu qeyd edib. Baş Nazir eyni zamanda, Gürcüstanın Tbilisidə münaqişə tərəflərinin nümayəndələrinin görüşünün keçirməsi də daxil olmaqla hər cür şəkildə bu prosesə töhfə verməyə hazır olduğunu açıqlayıb.