Silahlı Qüvvələrə Yardım Fonduna ayrı-ayrılıqda  5000 manat vəsait köçürüldü. Azərbaycan ordusunun Ermənistanın işğalçı silahlı dəstələrinin təxribatına cavab olaraq həyata keçirdiyi əks-hücum əməliyyatları bütün cəbhəboyu uğurla davam edir. Əsgər və zabitlərimizin fədakarlığı,  döyüş əzmi və qazandığı qələbələr  insanlarda böyük ruh yüksəkliyi yaradır. Azərbaycan ordusunun maddi-texniki təchizatı dövlət tərəfindən yüksək səviyyədə təmin olunsa da, əksər vətəndaşlar, o cümlədən müəssisə və təşkilatlar  orduya hərtərəfli dəstəyi mənəvi borc hesab edir, bu istiqamətdə əllərindən gələni əsirgəmirlər. Ermənistanın hərbi təcavüzünün qarşısının alınması, mülki əhalinin təhlükəsizliyinin təmin edilməsi üçün Ordumuzun həyata keçirdiyi zəruri əks-həmlə tədbirlərinə dəstək olmaq məqsədi ilə Bakıda  fəaliyyət  göstərən  Həştərxan  İş  Mərkəzi  və KDY Logistik Şirkəti  bu  təşəbbüsə  qoşulublar və    könüllü olaraq Silahlı Qüvvələrə Yardım Fonduna ayrı-ayrılıqda  5000 manat vəsait köçürüblər.