Azərbaycan Ordusuna dəstək olmaq üçün Ermənistanın işğalından azad edilmiş ərazilərdə mina/EYP (əl istehsalı partlayıcıları) axtarışı və məhv edilməsi fəaliyyətləri daxilində bu günə qədər 304 min 318 kvadratmetr ərazi minalardan təmizlənib. ONN media bildirir ki, bu sözləri Türkiyə Milli Müdafiə Nazirliyinin Mətbuat və İctimaiyyətlə Əlaqələr Müşavirliyinin analiz və qiymətləndirmə mütəxəssisi mayor Pınar Kara deyib. P.Kara bildirib ki, Azərbaycanla ikitərəfli hərbi və əməkdaşlıq sazişləri çərçivəsində Azərbaycan Silahlı Qüvvələrinin modernləşmə və təlim fəaliyyətlərinə dəstək davam edir: "Türkiyə Silahlı Qüvvələri və Azərbaycan Silahlı Qüvvələri birlikdə həyata keçirdikləri təlim və təcrübələrdə ixtisaslı heyətlə hər cür tapşırıqları yerinə yetirməyə qadir olduqlarını nümayiş etdirirlər. Nazirliyimizin tabeliyində olan Hərbi Zavod, Tərsanə Əməliyyatı A.Ş. ilə Azərbaycan arasında imzalanan Mexanik Mina Təmizləmə Təchizatının (MEMATT) İstehsalı və Təslimatı Layihəsi çərçivəsində 5 maşından ibarət ikinci partiya Azərbaycana göndərilib. Təhsil, yardım və məsləhət fəaliyyətləri daxil olmaqla, "iki dövlət, bir millət" anlayışı ilə bu günə qədər olduğu kimi azərbaycanlı qardaşlarımızın yanında olmağa davam edəcəyik".