Şəhərdaxili parklarda attraksionların işləməsi ilə bağlı qadağanın hələ də davam etməsi park işçiləri, həmçinin vətəndaşlar arasında narazılıq yaradır.

ONN media bildirir ki, bu barədə axar.az-a daxil olan vətəndaş müraciətində bildirilir ki, Sumqayıt parklarında attraksionlar işləyir, Bakıda isə vəziyyət tam fərqlidir.

Məsələ ilə bağlı saytımıza açıqlama verən Dənizkənarı Bulvar İdarəsinin İdarə Heyəti sədrinin müşaviri Könül İmamverdiyeva bildirib ki, insanların kütləvi axınını nəzərə alaraq davamlı dezinfeksiya işləri aparmaq və sosial məsafəni tənzimləmək mümkün deyil:

“Hazırda Dənizkənarı Milli Parkda attraksionlar işləmir. Ölkə ərazisində karantin qaydaları hələ də davam edir. Nazirlər Kabineti yanında Operativ Qərargah qərar verdikdən sonra bu məsələyə baxılacaq. Digər parklarda attraksionların çalışıb-çalışmaması ilə bağlı məlumatımız yoxdur”.

Sumqayıt şəhər İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin baş məsləhətçisi Eyvaz Qocayev isə deyib ki, Sumqayıt ərazisində bəzi parklarda uşaqlar üçün maşınlar işləyir, attraksionların hansı ərazilərdə işləməsi isə İH tərəfindən araşıdırılacaq.