İyun ayı ərzində Klinik Tibbi Mərkəzə 21 nəfər ilan sancması ilə müraciət edib.

Bu barədə Klinik Tibbi Mərkəzin Toksikologiya şöbəsinin müdiri, Səhiyyə Nazirliyinin baş toksikoloqu Azər Maqsudov məlumat verib.

Bildirilib ki, apreldə 1 nəfər, mayda isə 8 nəfər olmaqla bu il klinikaya ümumilikdə 30 nəfərin ilan sancması ilə müraciəti daxil olub. İlan sancmaları əsasən Bakının daş karxanası olan ərazilərində qeydə alınıb.

Məlumata əsasən, ötən ay 2 nəfər əqrəb, 1 nəfər isə qara qurd sancması ilə müraciət edib.

Qeyd edək ki, Azərbaycanda hər il 100-dən çox ilan sancmaları ilə zəhərlənmələr müşahidə olunur. Bu müraciətlərə, əsasən, aprelin əvvəlindən noyabra qədər rast gəlinir.