“Sevimli” əmtəə nişanı əqli mülkiyyət hüququ hesab olunur. Əqli mülkiyyət hüquqlarının hüquqi qorunmasını təmin etmək, onların mənimsənilməsinin və onlardan istifadə ilə bağlı hüquqların pozulmasının qarşısını almaq, bununla bağlı müvafiq tədbirlər görmək Əqli Mülkiyyət Agentliyi tərəfindən həyata keçirilir.

Bu barədə Azərbaycan Respublikasının Qida Təhlükəsizliyi Agentliyi (AQTA) tərəfindən verilən açıqlamada qeyd olunub ki, “Sevimli” məhsulunun saxta olmasına dair yayılan məlumatlar əsassızdır.

“Ölkəmizdə beynəlxalq standartların tələblərinə istinad edilərək hazırlanan AZS 731-1-2015 (01C/SMIIC 1:2011) “Halal Qida. Ümumi rəhbəredici sənəd” və AZS 731-2-2015 (01C/SMIIC 2:2011) “Halal sertifikatlaşdırmanı həyata keçirən orqanlar üçün rəhbəredici sənəd” standartları mövcuddur. “Standartlaşdırma haqqında” qanununa əsasən, bu sənəd standart-təkrar və ümumi istifadə üçün nəzərdə tutulan, mala (işə, xidmətə), onunla əlaqəli prosesə (o cümlədən idarəetmə sisteminə) və istehsal metodlarına dair norma, qayda və tövsiyələri müəyyən edən tətbiqi könüllü olan normativ sənəddir. “Sevimli” kolbasa məmulatı “Retro Holdinq” MMC tərəfindən istehsal edilir. Müəssisə 2019-cu ildən qida təhlükəsizliyi baxımından qeydiyyata düşüb. Dövlət reyestrində rəsmi qeydiyyatdadır. Qeydiyyatın çıxarış nömrəsi: 10-Q-00103; 30.09.2019-dur”, - açıqlamada bildirilib.

Qeyd edək ki, Azad İstehlakçılar Birliyi tərəfindən “Sevimli” nişanı ilə satışa buraxılan məhsulun saxta olmasına dair məlumat yayılmışdı. Saytımız tərəfindən göndərilən sorğuya əsasən, AQTA yayılan məlumatla bağlı araşdırma başlatmışdı.