Son zamanlar fırıldaqçılıq halları artıb. Naməlum şəxslər elan saytlarına dəyərindən daha ucuz qiymətə avtomobil, daşınmaz əmlak və s. yerləşdirir və çox sayda insandan "beh" alaraq, onların vəsaitini mənimsəyirlər.

ONN media  xəbər verir ki, bu barədə Trend-ə açıqlama verən Daxili İşlər Nazirliyinin Mətbuat Xidmətinin şöbə rəisi, polis mayoru Elşad Hacıyev belə halların olduğunu təsdiqləyib.

Bildirib ki, bunun qarşısının alınmasının birinci şərti vətəndaşın ehtiyatlı və diqqətli olmasıdır: "Sosial şəbəkə seqmentlərində, elan saytlarında kibercinayətkarlıqlarla bağlı vətəndaşları diqqətli olmağa çağırır, bir sıra qaydalara riayət edilməsini tövsiyə edirik:

- Mobil və şəhər nömrələrindən zəng edən şəxslərə bank-kart məlumatları, yəni kart sahibinin adı, soyadı, kartın son istifadə tarixi, CVV nömrəsi və təsdiq kodunu (“3D secure”) heç kəsə təqdim etməyin.

- Sosial media və elan saytları üzərindən satışa çıxardığınız məhsulları guya almaq məqsədilə özünün ölkədə olmadığını, həmçinin uzaq məsafədə olduğunu əsas gətirərək ödənişi onlayn yolla edəcəyini bildirən şəxslərə bank kartı məlumatlarını təqdim etməyin;

- İşə qəbul olunmağınızı əsas gətirərək guya “sağlamlıq haqqında arayış” üçün əvvəlcədən hansısa məbləğ tələb edən şəxslərə ödəniş etməyin;

- Saxta xarici nömrələrdən, həmçinin virtual nömrələrdən zəng edən şəxslərə bank kartı məlumatlarını təqdim etməyin".