"Star" NEZ üçün ən yaxşı və ən keyfiyyətli neft İran neftidir. Amma bəlli olan siyasi səbəblərə görə biz onu gətirə bilmirik.

ONN media xəbər verir ki, bunu "SOCAR Türkiyə" Emal və Neft-Kimya Bölməsinin rəhbəri, "Petkim"in Baş direktoru Anar Məmmədov deyib.

O qeyd edib ki, 2019-cu ilin aprel ayından imzalanan müqaviləyə görə, "Star" NEZ üçün ən uyğun olan Rusiya nefti idxal olunmağa başlandı: "Rusiya nefti bizim üçün ən optimal neft deyil. Sadəcə, Rusiya neftinin texniki şərtlərinə görə biz bu məhsuldan istifadə etmək məcburiyyətində qaldıq. Bu gün biz "Star"da dəyişiklik etmişik, 28 növ xam neftin testini etmişik. Dünyanın fərqli yerlərindən - Qazaxıstandan, Rusiyadan, Norveçdən, Aralıq dənizindən və bir çox ölkələrdən neft alırıq. "Star"ın dizaynı o vaxt İran nefti üçün qurulmuşdu. Əgər siyasi vəziyyət dəyişərsə, biz İrandan nefti gətirməyə davam edəcəyik. Bu gün biz İrandan neft almırıq. Venesuelanın çox ağır nefti var. Bizim üçün uyğun bir neftdir, amma onu da ala bilmirik".

Anar Məmmədov deyib ki, hazırda "Star" NEZ Azərbaycandan neft almır: "Çünki Azərbaycan nefti çox yüngüldür. "Azeri Light" çox dəyərlidir və şəffaf məhsulların çıxımı çox yüksəkdir. Onun qiyməti də biz aldığımız neftə görə daha yüksəkdir. "Star" bir zavod olaraq o qədər mükəmməldir ki, ən ağır və ən ucuz nefti alır, ondan yenə də 90 faizə yaxın şəffaf məhsullar çıxara bilirik. Bizim daha yüngül və daha bahalı neftə ehtiyacımız yoxdur. Təbii ki, Azərbaycan neftini də işlədə bilərik. Amma bu, bizim üçün iqtisadi cəhətdən çox effektiv olmayacaq. SOCAR üçün də çox optimal variant deyil. Azərbaycan neftinin dünyada çox yaxşı müştəriləri var".