Qazaxıstanın hakim partiyası “Nur Otan” cümə günü keçiriləcək qurultayında partiyanın sədrinin seçilməsi və Siyasi Şuranın tərkibində dəyişikliklər edilməsi məsələsinə baxacaq.

ONN media xəbər verir ki, bu barədə  partiya sədrinin birinci müavini Baurjan Baybek Twitter səhifəsində yazıb.

Bundan əvvəl o partiya qurultayının yanvarın 28-də onlayn keçiriləcəyini açıqlamışdı. 2021-ci ilin noyabrında Qazaxıstanın birinci prezidenti Nursultan Nazarbayev xalqa müraciətində “Nur Otan” sədrinin səlahiyyətlərinin dövlət başçısı Kasım-Jomart Tokayevə verilməsini təklif edib. 

Nazarbayev qeyd edib ki, partiyaya ölkə prezidenti rəhbərlik etməlidir. 

Partiyanın sədrinin seçilməsi nizamnaməyə görə qurultayın səlahiyyətindədir.

“Siyasi şuranın qərarı ilə növbədənkənar XXI qurultayın gündəliyi təsdiq edilib: “1. Partiyanın sədrinin seçilməsi haqqında; 2. Nizamnaməyə əlavə və dəyişikliklər edilməsi haqqında; 3. Siyasi Şuranın tərkibinə dəyişiklik edilməsi haqqında”.