Fransa Prezidenti Emmanuel Makron Rusiyanın paytaxtı Moskvada Rusiya Prezidenti Vladimir Putinlə keçirdiyi görüşdən əliboş qayıdıb.

ONN media  xəbər verir ki, xarici mətbuat görüşün Fransa Prezidentinin ümid etdiyi kimi keçmədiyini yazıb.

Belə ki, kritik səfər baş tutmamışdan əvvəl Kremlin sözçüsü Dmitri Peskov Makronun ürəyincə olmayan açıqlama verib. Vəziyyətin çox mürəkkəb olduğunu və görüşdən ciddi irəliləyiş gözləmədiklərini deyən Kreml rəsmisinin sözləri ümumi nəticə haqqında təsəvvür yaratmağa imkan verir.

Görüşdən sonra Putin və Makron birgə mətbuat konfransı keçirib. Mətbuat konfransında ilk sözü deyən lider Putin oldub. Görüşün mövzusu Ukrayna olmasına baxmayaraq Rusiya liderinin əsas hədəfi Qərb ölkələri və NATO idi.

Putin çıxışında Qərb ölkələrinə və Rusiya ordusunun Ukrayna sərhədinə yerləşdirilməsini və təlimlər keçirməsini tənqid edən NATO-ya sərt reaksiya verib:

“Hərbi infrastrukturunu sərhədlərimizə yaxınlaşdıran NATO və üzv dövlətlər silahlı qüvvələrimizi harada və necə yerləşdirməyimizlə bağlı bizə dərs keçməyə çalışırlar. Rusiya qoşunlarının öz ərazisindəki hərəkətləri Ukraynaya qarşı Rusiya təhdidi kimi təqdim edilir”, - deyə Putin bildirib.