Məlumdur ki, Ukrayna və Rusiya nümayəndə heyətləri razılaşıblar ki, ortada real razılaşma olmayana qədər müzakirələrin detalları barədə açıqlama verməyəcəklər. Müzakirələrin ictimai müzakirəsi o halda mümkün olacaq ki, imzalanmaya hazır olan yaxşı baza sənədi ortaya qoyulsun. O vaxta qədər bütün bu detallar ictimai müzakirəyə çıxarılmayacaq.

ONN media bildirir ki, bunu “Current Time”-ın efirində Prezident Ofisi rəhbərinin müşaviri Mixail Podolyak deyib. Bununla belə o, danışıqların gedişi və predmeti ilə bağlı ümumi açıqlamalar verməyə razılaşıb.

“Biz müharibəni yalnız bir şərtlə bitirəcəyik - bütün Rusiya qoşunları Ukrayna ərazisindən tamamilə çıxarılsın, bütün yaşayış məntəqələri azad edilsin”,- o deyib.

Eyni zamanda, Podolyak hazırda konkret hansı məsələlərin müzakirə edildiyini açıqlamayıb.

Xatırladaq ki, Podolyak bir müddət əvvəl Ukrayna və Rusiya nümayəndə heyətlərinin videoformatda davamlı danışıqlar apardığını bildirmişdi. Bunun üçün xüsusi işçi altqruplar yaradılıb.

Məlumdur ki, martın 10-da Türkiyənin Antalya şəhərində Ukrayna və Rusiyanın xarici işlər nazirləri Dmitri Kuleba və Sergey Lavrov arasında danışıqlar aparılıb. Danışıqlardan sonra Kuleba bildirib ki, Rusiyanın tələbləri Ukrayna üçün qəbuledilməzdir, çünki onlar kapitulyasiya deməkdir.

Prezident Vladimir Zelenski brifinq zamanı bildirib ki, Qüdsdə Rusiya ilə danışıqlar aparmağa hazırdır.

Eyni zamanda Ukrayna rəsmilərindən biri mətbuata bildirib ki, Ukrayna ölkənin ərazi bütövlüyündən bir addım da geri çəkilməyib. Danışıqlar zamanı Ukraynanın tələbləri sırasında nəinki Rusiya ordusunun Ukraynadan çıxarılması, həmçinin Rusiyanın Ukraynaya vurduğu ziyana görə təzminat ödəməsi də yer alır.

Son olaraq Rusiya mediasının Türkiyə XİN-ə istinadən yaydığı xəbərə görə, Rusiya prezidenti Vladimir Putin Ukrayna prezidenti Volodimir Zelenski ilə görüşməyə hazır olduğunu bildirib. Məlumatda deyilir ki, Putin bunu telefon danışığı zamanı Türkiyə prezidenti Rəcəb Tayyib Ərdoğana deyib. Əvvəllər Rusiya belə bir görüşün baş tutması üçün ön şərtlər irəli sürürdü – Kreml görüşdən əvvəl Ukraynanın şərtləri qəbul etməsini tələb edirdi. Amma son məlumatlara görə, Putin hən hansı şərt irəli sürmədən Zelenski ilə görüşə gedə bilər.

Xatırladaq ki, müharibənin 18-ci günü davam etsə də, Rusiya ciddi irəliləyişə nail ola bilməyib. Ukrayna Müdafiə Nazirliyinin açıqlamasına görə, Rusiyanın döyüşə atdığı 90 batalyondan 30-u məhv edilib və ya yararsız hala salınıb.

Rusiya əlavə qüvvələr cəlb etməkdə çətinlik çəkir. Müdafiə naziri Sergey Şoyqu rəsmən açıqlayıb ki, Putin Yaxın Şərqdən, o cümlədən Suriyadan 16 min döyüşçünün Ukraynaya göndərilməsinə göstəriş verib. Xatırladaq ki, 44 günlük müharibə zamanı bir sıra Rusiya rəsmiləri və az qala bütün Rusiya mediası Azərbaycanı Yaxın Şərqdən muzdluları gətirməkdə ittiham edirdi. Amma bu vaxta qədər bu ittihamlarla bağlı bircə dənə də olsun, sübut təqdim edilməyib.(bizimyol.info)