Yazın gəlişi ilə tez-tez rast gəlinən allergik xəstəliklərin göz sağlamlığına mənfi təsir edir.

ONN media xəbər verir ki, bunu Türkiyənin Kornea və Refraktiv Cərrahiyyə Mütəxəssisi Volkan Hürmeriç bildirib. Gözlərdə yanma, sulanma, qaşınma və qızartı kimi şikayətlərə səbəb ola bilən göz allergiyasının gündəlik həyat keyfiyyətini aşağı saldığını dilə gətirən Hürmeriç, göz qaşıma vərdişi ilə bağlı xəbərdarlıq edib. Gözlərini tez-tez qaşıyan insanlarda xəstəlik yarana bilər.

“Allergiyası olanların gözlərini tez-tez qaşımaq vərdişi keratokonus adlı göz xəstəliyinə səbəb ola bilər. Xüsusilə allergiyası olan və müalicə olunmayan uşaqlarda uzun müddət göz qaşıma vərdişi müşahidə edilir. Uşaqlıq və yeniyetməlik dövründə genetik faktorlarla yanaşı, daim göz qaşımaq vərdişi də gözlər üçün böyük risk yaradır”,-deyə mütəxəssis bildirib.

Həkim qeyd edib ki, xüsusilə uşaqlar günəşdə və ya işıqlı mühitdə gözlərini açmaqda çətinlik çəkir və ya gözlərini çox qaşıyırlar. Tozcuqların artdığı fəsillərdə yanma, qaşınma, işığa həssaslıq kimi şikayətlər artır. Allergik xəstəliklər ümumiyyətlə havalar isinməyə başlayan may, iyun və iyul aylarında, soyumağa başlayanda isə sentyabr, oktyabr, noyabr aylarında artır. Allergiyası olan xəstələrin həkim tövsiyəsi ilə müalicə alması vacibdir.

Onun sözlərinə görə, keratokonus gözün ən kənar hissəsində yerləşən buynuz qişa toxumasının incəlməsi ilə xarakterizə olunur. Keratokonus xəstəliyi yavaş irəlilədiyi üçün gec aşkar edildikdə görmə itkisinə səbəb ola bilər. Keratokonus xəstəliyi yalnız xüsusi göz testləri ilə aşkar edilir. Standart bir göz müayinəsində diaqnoz yalnız inkişaf etmiş hallarda mümkündür. Xəstəliyi erkən mərhələdə aşkarlamaq çətindir. Bunun üçün buynuz qişa topoqrafiyası deyilən testlər verilməlidir.

Həkim qeyd edib ki, keratokonus xəstəliyində ilk addım xəstəliyin irəliləməsini dayandırmaqdır. Keratokonusun inkişaf riski yaşla azalır. Ən böyük risk gənc yaşlarda olur. Xəstəlik uşaqlarda daha aqressiv olur. 12-25 yaş arası hallarda erkən diaqnoz çox əhəmiyyətlidir. Xüsusilə 20 yaşdan aşağı şəxslərə keratokonus xəstəliyi diaqnozu qoyulduqda xalq arasında 'şüa terapiyası' adlandırılan çarpaz bağlama müalicəsi mütləq tətbiq olunmalıdır ki, bu da xəstəliyi dayandırır.